Blog

ඔබ දෙයකට ආසයි ද ?? එහෙමත් නැත්තම් ආදරෙයි ද?.. අපි හැමෝම දන්න ප්‍රසිද්ධ කියමනක් තියෙනවා. ඒ කියමනට අනුව අපි මලකට ආසයි නම් අපි ඒ මල කඩා ගන්නවා. හැබැයි අපි මලකට ආදරෙයි නම් අපි ඒ මල ආරක්ෂා කරනවා. ඔව්. ඒක ඇත්තක්. පොඩි කාලෙ ඉදං අපි ආස කරන එක එක දේවල් තියෙනවා. අපි ඒ දේවල් කොහොමහරි ලබා ගන්න උත්සාහ කරනවා. අපේ හිතේ තියෙන ආසාව ඉවර වෙනකම් අපි ඒව පරිහරණය කරනවා. හැබැයි ඒ ආසාව ඉවර උනාම අපි මොකද කරන්නෙ. ඒක අපෙ හිතින් අතඇරලා දානවා. එතනින් එහාට ඒක ගැන ආසාවක් නෑ.. ආයෙ ඒකෙ උවමනාවක් නෑ. ඒක තමයි ඇත්ත. හැබැයි හිතන්න.. අපි දෙයකට ආදරෙයි නම් අපි ඒ දේ ආරක්ෂා කරනවා. අයිති කරගන්න පුළුවන් උනත්, බැරි උනත් අපි ඒ දේ දුර තියාගෙන හරි රකිනවා. ඇත්තට ම ඒක තමයි ආදරේ. අපේ හිතේ ඒ දේ ගැන ආදරයක් තියෙනකම් අපි ඒ දේ රකිනවා. ඒත් මොහොතකටවත් අපි හිතනව ද ඒ ආදරේ නැති උනොත් ඇති වෙන ඊළඟ සිතුවිල්ල ගැන. ඔන්න අපි ආස දේක ආසාව නැති උනාම කලින් කිව්ව වගේ අතඇරල දානව. එතනින් ඒක ඉවරයි. හැබැයි ආදරේ අවසානය බොහෝ වෙලාවට කෙළවර වෙන්නෙ අත් හැරීමකින් නෙවෙයි. අන්න ඒක තමයි ආදරේ තියෙන භයානකකම. සමහර වෙලාවට ඒක වෛරයක් වෙන්න පුළුවන්. එහෙමත් නැත්තම් පලිගැනීමක් වෙන්න පුළුවන්. කලාතුරකින් අත් හැරීමක් ම වෙන්නත් පුළුවන්. අපි කලින් ගත්ත මලේ උදාහරණය ම ගමුකො. අපි මලකට ආසයි නම් ඒ ආසාව නැති උන දවසට අපි ඒ මල අත් හැරල දානවා. අපි මලකට ආදරෙයි නම් ඒ ආදරේ නැති උන දවසක අපි ඒ මල කඩල විනාශ කරල දාන්න පුළුවන්. ඒක සිදු වෙන්නෙ අපේ හිතට ඇති වෙන සිතුවිල්ලත් එක්ක. ප්‍රේමයේදිත් වෙන්නෙ මේකම යි. අපි සමහරුන්ට ආස නිසා අපි එයාලව අපේ ළඟට ගන්නවා. ආසාව ඇති වෙන විදිහ සාපේක්ෂ යි. සමහර වෙලාවට අනිත් කෙනාගෙ රූපයට ආසාවක් ඇති වෙන්න පුළුවන්. එහෙමත් නැත්තම් ඔහුට හෝ ඇයට තියෙන සමාජ තත්වය, ධනය,රැකියාව, හැකියාවන් වගේ දේවල් නිසත් ආසාව කියන දේ ඇති වෙන්න පුළුවන්. ඒ විදිහට ඇති වෙන ආසාව මොකක් හරි හේතුවක් නිසා නැති උනොත් අපි කරන්නෙ ඔහුව හෝ ඇයව අත් හැරල දාන එක. හැබැයි අපි කෙනෙක්ට ඇත්තට ම ආදරේ කරන නිසා ඔහුව හෝ ඇයව ළං කර ගත්තොත් අපි හැම මොහොතෙම උත්සාහ කරන්නෙ ඔහු හෝ ඇය ළඟින් ඉන්න. ඒත් මොකක් හරි හේතුවක් නිසා ඒ ආදරේ නැති වෙලා ගියොත් ???.. එතනින් එහාට මොකද්ද වෙන්නෙ. කෙනෙක්ට කියන්න පුළුවන් ඇත්තට ම ආදරේ කරානම් එතන තියෙන්නෙත් අත් හැරීමක් තමා කියලා. එහෙනම් ඇයි මිනිස්සු ආදරේදි මේ තරම් විදවන්නෙ. සමහර ආදර කතා අවසානෙදි ඇයි එක්කෙනෙක්ගෙ ජීවිතයක් අහිමි වෙන්නෙ. ඒක තමා වෛරය.. පලිගැනීම. කරපු ආදරේ තරමට ම ඇති වෙන වෛරයත් ප්‍රබල වෙන්න පුළුවන්. අපි මෙච්චර කල් දැක්කෙ ආසාවෙ නරක පැත්තයි, ආදරේ සුන්දර පැත්තයි විතරයි.හැබැයි ඒකෙ ඇතුළෙ අපි නොදකින් පැත්තකුත් තියෙනවා. ඒ නිසා පරිස්සමින්. ආදරය ආසාව ප්‍රේමය හැමදේම සුන්දර යි.. හැබැයි ඒ හැමදේක ම අවසානයත් සුන්දර කර ගන්න අපි දැනගන්න ඕනි. සුන්දර ම අවසානය නම් අත් හැරීම යි. ආදරෙන් හරි ආසාවෙන් හරි ළඟ තියාගෙන රැක ගන්න උත්සාහ කරනවට වඩා අත් හැරල දුර ඉදං ආදරේ කරන තැන ලොකු වටිනාකමක් වගේ ම ලොකු මානසික නිදහසක් තියෙනව. ආදරේ කරන්න. හැබැයි අල්ල ගන්න එපා. යන අයට යන්න දෙන්න. ඔබව වටින අය මොන දේ උනත් අවසානය වෙනකන් ම ඔබ ළඟ රැදෙයි. එය යි සැබෑ ආදරය.