Blog

වරක් හෝ අසා නැතිනම් අසන්නට වටිනා මනා කාව්‍ය පද අපූර්වත්වයක විචාරය පබඳින්නට අවසරයි. මෙම ගීතය නල දමයන්ති නම් මුද්‍රා නාට්‍යයේ එන ගීතයක් වන අතර සිංහල ගීත සාහිත්‍යයේ එන ප්‍රථම සහ සාහිත්‍යමය එකම පුරුෂයෙකු ගායනා කරන පුරුෂ වර්ණනා ගීතය මෙය වනවා. මහගමසේකරයන්ගේ අපූරු පද පෙළට ලයනල් අල්ගමයන් ගේ තනුව මුසුවී මේ අපූරු ගී ත්‍රිකෝණය සපුරන්නට නිවී ගිය ගී පහන් සිල ආචාර්‍ය පණ්ඩිත් ඩබ්. ඩී. අමරදේවයන් දායක වී ඇත. නල දමයන්ති කතා පුවත වනාහී නල නම් කුමරුන් හා දමයන්ති කුමරිය අතර ඇති වන්නවූ කල්පිත ප්‍රේමයක් හංසයෙක් මාර්ගයෙන් පෙම් බස් හුවමාරු කරනා කතාවක අපූරු ගෙත්තමකි. නල කුමරුවන් භාරතයේ නිශාදය නම් රාජධානියේ වසන කුමාරයෙක්. පින් මහිමයෙන් රත්තරන් පැහැ ශරීරයක් ඇති කතා කරන වචන යමෙක් දැහැන් ගත කරවන තරම් අපුරූ රූ කෝකිල වදන් ඇති ශ්‍රේෂ්ඨ ගති පැවතුම් ඇති කුමාරයෙක්. ඔහුට ගැළපෙන එකම කුමාරිය ලෙස මේ හංසයා දන්නා එකම කුමරිය දමයන්ති කුමරියයි. ඇයත් ශුද්ධ උභය කුල දෙපාර්ශවයෙන්ම පිවිතුරු කුමරි බඹසර දිවි හිමියෙන් සුරැකි කුමාරිකාවක්. මේ ගීතයෙන් මේ දෙදෙනා ප්‍රේමයෙන් ඇලලී යන තරමට හංසයා කුමරියට ගොස් කුමරුවන්ගේ වර්ණනාව වණනා ආකාරය දැක්වේ. ඈත කදුකර හිමව් අරණේ සීත චන්දන ලපලු සෙවනේ සුළන් රැල්ලේ පාව එන්නේ ඔහුගෙ නාමය වේ... සිංහල සාහිත්‍යයේ එන අතිශයෝක්තිය මොනවට යොදා පබැදා ඇති බව මනාව පිළිබිඹු වේ. හංසයා කුමරා හදුන්වා දෙන්නේ ප්‍රථමයෙන් නම විස්තර කර දීමෙන්. ඈත හිමාල අරණේ සදුන් දළු සිලි සිලි ගන්වමින් එන සීතල සුළං වලින් එන්නේ ඔහුගේ නාමය යි. මේ නොකියා ව්‍යක්තය අරඹයා කියාපාන්නේ ඔහුගේ නාමය ''නල'' යන්නයි. තවද මෙහි යොදාගෙන ඇති අර්ථවත් වචන මවන්නේ සෞභාග්‍යවත් වටපිටාවක්. සීතල බව හිමාල අඩවිය මවා පාන්නේ අපූරු චමත්කාරජනක වටපිටාවක්. හංසයා මේවා මගින් තවමත් නොදුටු කුමාරයෙක් ගැන දමයන්ති කුමරියගේ සිතේ රුචියක් ඇති කිරීමට මනා උත්සාහයම් දරන බව පෙනේ. සේකරයන්ගේ අපූරු කාව්‍යෝක්ති විලාසල වනාහී අපූරු වට පිලිඹිබු වන අවස්තාවකි මෙය. සදැල්ලේ මිණි තලාවේ තාරකා පිපි වෙලාවේ ළද ලියන්ගේ සීන අතරේ මැවෙයි ඒ රූපේ... ගීතයක් තුල සංකල්ප රූප මැවිය හැකිනම් එය අපූරු හැකියාවක්. මේ ගීතය එය කොපමණ දුර අත්පත් කරගෙන තියේ දැයි මේ පද කිහිපයම සාක්ෂි දරා සිටිනු ඇති. සදළුතයේ සිට බලන කල මැණික් බබලන්නා සේ පෙනෙන තාරකා, මල් සේ පිපුනු අපූරු රාත්‍රියක ළපටි කාන්තාවන් දකින සිහිනයන් තුළ පවා ඒ අපූරු රුවමයි මැවෙන්නේ කියා හංසයා වර්ණනා කරනවා. කුමරියන් පතන්නේ මෙවන් කුමාරයෙක් බව හංසයා වණනවා තවද පරිසරයේ අපූරු ව්‍යක්තීන් මවා පාන්නේම අපූරු ලයාන්විත ආලින්ගනාත්මක සිතුවමක්. රනින් කල වන් පුළුල් උරයෙන් හසුන් ළමැදේ මුස කරන්නේ හදේ මෝරන ආදරේ හදේ සොමි ගුණ යා කෙරේ සරාගී නිල් නුවන් බදුනින් නුරා වෑහෙන්නේ... තව තවත් කුමර වර්ණනාවේ යෙදෙන හංසයා පවසන්නේ කුමාරයාගේ උරහිස් රනින් කරවන ලද පුළුල් ඒවා බවයි. ඒ තරම් දිදුලන ශරීර අඟ පසඟ හිමි කුමරුවකු නැති කරගන්න නම් එපා යැයි හංසයා අයදින තරම් බව මින් පිළිබිඹු වේ. මේ තරම් අපූරුවට වර්ණනා කල ගීයක් තවත් නැති යයි සිතේ. මේ පුළුල් උර තලය දකිනා ළදුන්ගේ ළමැදේ හංසයන් එනම් පයෝධර ශෘංගාරයෙන් මත් වී යන බව මනා සංයමයකින් කවියා අපූරුවට පවසා ඇත. තවද කුමරුවන් කෙරෙහි හදේ මෝදු වී එන්නා වූ ආදරය හරියට සිසිල් චන්ද්‍රයාගෙන් ගලා එන සඳ කිරණ මෙන් බව කවියා පවසනවා. ඒ තරම් අනුරාගී හැගුම් උතුරන නල කුමාරයා ගේ ආත්ම වර්ණනාව මෙතරම් අපූරුවට කිරීම මහගමසේකරයන්ගේ හැකියාවත් එය අරුත් රසයෙන් වර්ණගන්වා ඉදිරි පත් කිරීම අමරදේවයානන් ගේ ශූරී විදග්ධ කලා මහිමයත් යමෙක් දැහැන්ගත කරවන්නට නිවා සනහන්නට සමත් අල්ගමයන් ගේ තනු නිර්මාණයත් එක්තරා විශිෂ්ඨතම නාට්‍ය ගීතයක් ලෙස මෙය හදුන්වන්නට පුළුවන. ඈත කඳුකර හිමව් අරණේ සීත චන්දන ලපලු හෙවනේ සුළං රැල්ලේ පාව එන්නේ ඔහුගෙ නාමය වේ // සඳැල්ලේ මිණි තලාවේ තාරකා පිපි වෙලාවේ // ලදැළියන්ගේ සීන අතරේ මැවෙයි ඒ රූපේ ඈත කඳුකර හිමව් අරණේ සීත චන්දන ලපලු හෙවනේ සුළං රැල්ලේ පාව එන්නේ ඔහුගෙ නාමය වේ රනින් කල වන් පුළුල් උරයෙන් // හසුන් ළමැදේ මුස කරන්නේ හදේ මෝරන ආදරේ සඳේ සොමි ගුණ යා කෙරේ හදේ මෝරන ආදරේ සඳේ සොමි ගුණ යා කෙරේ සරා ගී නිල් නුවන් බඳුනින් නුරා ඉතිරෙන්නේ ඈත කඳුකර හිමව් අරණේ සීත චන්දන ලපලු හෙවනේ සුළං රැල්ලේ පාව එන්නේ ඔහුගෙ නාමය වේ.