Blog

ධනාත්මක, සෘණාත්මක, තරමක් ධනාත්මක, තරමක් සෘණාත්මක, හොඳටම ධනාත්මක, හොඳටම සෘණාත්මක... දන්නවද?  හැමදේක ම හිතන්න දේවල් එකකට වඩා වැඩි ගණනක් තියෙනවා. කාසියක දෙපැත්තක් තිබ්බට, මතක තියාගන්න කාසියට දාරයකුත් තියෙනවා.  ජීවිතයත් ඒ වගේ රස, නීරස, දුක, සැප, විශ්වාසය, අවිශ්වාසය, හැමදාම හැමතැන ම නැති වුණත් අපට ඒවා කොතැනක හරි විඳින්න ම වෙනවා.  ඉතිං මම පොඩි ප්‍රශ්නයක් අහන්නම්.  ඒ හැම දේකටම මුණ දෙන්න ඔයත් එක්ක ඔයා ඉන්නවද?  ‘අවිශ්වාසයේ නිෂේධනය’  අවිශ්වාසය කියන්නේ විශ්වාසයක් නැහැ, නිෂේධනය කියන්නේ නැත යන අර්ථය. අවිශ්වාසයේ නිශේධනය සරල ව ම විශ්වාසයේ නියත අර්ථය යි. ලෝකයේ ගොඩක් මිනිස්සු ඉන්නවා විවිධ විවිධ විදියට හිතන, ඒ මිනිස්සු කී දෙනෙක් තමන් ගැන ම විශ්වාසය රඳවා ගෙන ඉන්නව ද?  ඒ මිනිස්සුන්ගෙන් කී දෙනෙක් තමන්ගේ ජීවිතයේ ඉරණම අනුන් මතින් විශ්වාස කරනවා ද?  දැන් පොඩ්ඩක් හිතන්න ඔයා අයිති මොන කාණ්ඩයට ද?   ඔයා ඔයා ව ම විශ්වාස කරන කෙනෙක් ද? එහෙම නැත්නම් ඔයා ඔයාට වඩා අනිත් අයව විශ්වාස කරන කෙනෙක් ද? ඔයා වැඩිපුර ම විශ්වාස කරන්නේ කාවද? අඩුවෙන් ම විශ්වාස කරන්නේ කාවද? විශ්වාසයේ මොන වගේ මට්ටමක් ද ඔයා ඔයාට ම දෙන්නෙ? කාටත් කලින් මුලින් ම ඔයා ඔයා ව ම විශ්වාස කරන්න. ඔයා ඔයා ම වෙන්න. ඔයා ළඟ ඔයා ව තියා ගන්න. ඔයා ඔයාට ආදරේ කරන්න, ඔයා ඔයත් එක්ක කතා කරන්න. මිනිස්සු අකමැති යි තමන් ළඟ වෛරකාරී ද්වේශකාරී සිතුවිලි තියෙනවා කියලා පිළිගන්න. නමුත් පිළිගන්න ම වෙනවා. ඒකට ඔයා, ඔයා එක්ක කතා කරන්න ම වෙනවා. එක පොඩි ප්‍රශ්නය යි, “ඇත්තටම මම කවුද?” එකම එක වතාවක් අහන්න ඔයාගෙන් “මම කවුද?” කියල විතරක්. ලැබෙන පිළිතුර සතුටුදායක වේවි. සමහර විට පීඩාකාරී වේවි. සතුටුදායක පිළිතුරක් ලැබුණා නම් ඔයා ඔයාව තව වර්ධනය කරගන්න. ඒත් පීඩාකාරී පිළිතුරක් ලැබුන නම් ඔයා ඔයාව පොඩ්ඩක් වෙනස් කරගන්න.  ඔයා ඔයත් එක්ක ම හිනා වෙන්න. තව එකක් මේක අනිවාර්යෙන් ම කරන්න. ඔයා ඔයත් එක්ක පොඩ්ඩක් තනි වෙන්න. ආදරේ දෙන්න ඔයාගෙ ජීවිතේට. අගය කරන්න ඔයාගේ හැකියාවන්, සමහර විට තමන් විසින් තමන් ව අගය කර ගැනීම සමාජයේ අනෙක් අය අමුතුවට දකින්න පුළුවන්. ඒත් එහෙම දකින්නේ තමන්ගේ ජීවිතේ ඇතුළේ තමන්ට කියලා ඉඩක් හදා ගත්තෙ නැති මිනිස්සු.  මිනිත්තුවක් හිතන්න ඔයා ඔයාට අගය කිරීමක් දෙන්න තරම් තමන්ව විශ්වාස කරන්න බැරි නම් ඔයාට ඒ අගය කිරීම වෙන කෙනෙක්ගෙන් ලැබෙයි කියලා කොහොමද විශ්වාස කරන්නේ? ඒ නිසා පොඩි ම පොඩි දෙයකින් හරි තමන්ව අගය කරන්න. ඒ මොහොතේ ජීවිතේ සතුටින් පිරේවි. තවත් පොඩි දෙයක් කියන්නද?  කවදහරි ඔයාගෙ ජීවිතයේ ඔයා ඔයාගෙ ම අත් දෙකෙන් අල්ලලා තියෙනව ද? නෑ නේද? මෙහෙම කරන්න, ඔයාගේ වමතින් ඔයාගේ දකුණු අත අල්ලගන්න. තදින් අල්ලා ගන්න. ඔයා ඒ අල්ලගෙන ඉන්නෙ ඔයාගෙ ජීවිතේ. ඔයාට ඔයාගේ අත් දෙක විශ්වාස නම්, කවදාවත් ඒ විශ්වාසය පළුදු කරන්න වෙන කෙනෙක්ට ඉඩක් දෙන්න එපා. සමාජයේ ඉන්නෙ ගොඩක් ම සෘණාත්මක ව හිතන මිනිස්සු. ඒ මිනිස්සු අතර ඔයා ඔයා වෙන්න. ඔයාගෙ ජීවිතේ ඔයා ළඟ තියාගන්න. අපි හැමදාම හුස්ම ගන්නවා, ඒත් ගොඩක් බර හුස්මක් ගනිද්දි තමයි අපි ඇත්තටම හුස්ම ගන්නවා කියලා දැනෙන්නේ. හැමදාම හුස්ම ගන්න පිට කරන එක සාමාන්‍ය යි. ඒත් බර හුස්මක් අසාමාන්‍ය යි. ජීවිතයේ බරට දැනෙන තැන්වලදි තමයි අපි බර හුස්මක් ගන්නෙ. ඒ වගේ ජීවිතේ රහට දැනෙන අවස්ථා සමරන්න. ඉඳලා හිටලා බර හුස්මක් ගන්නවා වගේ, ඉඳලා හිටලා ඔයාව අගයන්න. එතකොට ඔයා ගැන ඔයාට පැහැදිලි දැක්මක් ලැබේවි. ඒ දැක්ම එක්කම ඔයා ඔයාගෙ ජීවිතය අවිශ්වාසයේ නිශේධනයෙන් පුරවාවි.