Blog

මේ චිත්‍රපටිය බලනකොට මට මතක් වුණේ මහා භාරතයේ පාණ්ඩව පුත්තු පස් දෙනාගෙන් දෙවනියාව. තවත් විදිහට කිව්වොත් යුධිෂ්ඨීර්, භීම්, අර්ජුන්, නකුල් සහ සහදේව් අතරින් භීම් ව. මහා භාරතයේ කියන විදිහට භීම්ට තියෙනවා ඇත්තු දස දහසකගෙ ශක්තියක්. මේ කතාවෙ චන්දෲ කියන නීතිඥයත් එහෙමම තමයි. මහා භාරතයේ භීම් 'ගදා යුද්ධය' ජය ගත්තා වගේ තමයි, චන්දෲත් ඔහුට ලැබෙන නඩුව ජයග්‍රහණය කරා අරගෙන යන්නෙ. දැන් බලමු මේ චිත්‍රපටියෙ කතාව මොකක්ද කියලා. කතාව 1995 අවුරුද්දෙ සිදුවුණ බවයි අපිට කියන්නෙ. ඒ අනුව සෙංගෙනීයි - රාජ්කන්නූයි කියන්නෙ 'ඊරුලා' කියන ජාතියෙ අය. ඇත්තටම දකුණු ඉන්දියාවෙ 'ඊරුලා' කියන්නෙ සර්පයො අල්ලන පහත් කුලයෙ මිනිස්සු කොට්ඨාසයකට. අපි අහිගුණ්ඨික මිනිස්සු කියලා කියන්නෙ. ඒ වගේ ජන කොටසකට. සෙංගෙනීටයි - රාජ්කන්නූටයි පුංචි දුවෙක් ඉන්නවා. ඒ අතරෙ සෙංගෙනීට දෙවනි දරුවෙක් ලැබෙන්නත් ඉන්නෙ. ඔන්න දවසක්දා රාජ්කන්නූට ගමේ ගම්මුලාදෑනියාගෙන් පණිවිඩයක් එනවා. ඒ ඔහුගෙ ගෙදරට රිංගපු නයෙක්ව අල්ලන්න කියලා. රාජ්කන්නූ වැඩේ අපූරුවට කරනවා. ඒ වුණාට වැඩි දවසක් යන්නෙ නෑ. ගම්මුලාදෑනියාගෙ ගෙදරට හොරු පනිනවා. පොලිස් විමර්ශන වලින් සොයා ගන්න ඇගිලි සලකුණු මත, හොරකමට චෝදනාව එල්ල වෙන්නෙ රාජ්කන්නූට. මේ වෙනකොට රාජ්කන්නූ ගමේ නෑ. ගඩොල් කපන්න ගමෙන් බැහැරට ගිහින්. රාජ්කන්නූ වෙනුවෙන් මුලින්ම අමානුෂික විදිහට පොලිසියෙන් ගුටි කන්නෙ දරුවෙක් කුස දරාගෙන ඉන්න ඔහුගෙ බිරිඳ. අනතුරුව හිතවත් කිහිප දෙනෙක්. ඊටත් පස්සෙ රාජ්කන්නූගෙ සහෝදරිය. කොහොමහරි මේ මුකුත් නොදන්න රාජ්කන්නූ නැවත ගමට එනකොට, ගම්මු ඔහුට ගහලා පොලිසියට භාර දෙනවා. වැඩි දවසක් යන්නෑ. පොලිස් භාරයෙ හිටපු රාජ්කන්නූ ඇතුළු තිදෙනෙක් පළා ගියා කියලා පොලිසිය කියනවා. ඇත්තටම මේක අභිරහසක්නෙ. ඉතින් මේ පීඩිත මිනිස්සුන්ට යුක්තිය ඉටු කරන්න කවුරුත් නෑ. හැබැයි චන්දෲ නම් වූ නීතිඥයා ඔවුන් වෙනුවෙන් පෙනී ඉන්නවා. කතාවෙ ඉතිරිය, ඔබට සම්පූර්ණ චිත්‍රපටිය නැරඹුවොත් දැනගන්න පුළුවන්. "...සැඟවූ අවි පෙන්නන්න යද්දි, පළායෑමට තැත් කිරීම නිසා ඇති වූ වෙඩි හුවමාරුවකින්..." විදිහෙ ප්‍රවෘත්ති ඇහෙන දූපත් වලට මේක මරු. සල්ලිකාර පුත්තු මාරාන්තික අනතුරු කළාම, කමිසයෙ බොත්තමකින් විතරක් අල්ලන පොලිසිය ඉන්න දූපත් වලට මේක මරු. භාෂාව - දෙමළ අධ්‍යක්ෂණය - ටී. ජේ. ග්යාන්වේල් ධාවන කාලය - පැය 2 යි මිනිත්තු 44 යි රංගනය - සූර්යා, ප්‍රකාශ් රාජ්, රාව් රමේශ්, රජීශා විජයන්, මණිකණ්ඩන්, ලීජෝමෝල් ජෝස්