Blog

ගායනය : තිසර වීරසිංහ පද රචනය : රුෂාන් සිල්වා සංගීතය : ළහිරු ද කොස්තා "අන්සතු ඔබ වෙත මගෙ හිත බැඳිලා ඔබ ගැන සෙනෙහස හද තුළ පිරිලා සම්මතයෙන් පිට ප්‍රේමෙක වෙලිලා මඟ හැර යන්නට බැරි ලෙස බැඳිලා" අන්සතු කියන වචනෙ ඇහෙද්දි ම මට මතක් වුණේ ඔයාව. මම දන්නවා ඔයාටත් මතක් වෙන්නේ මාව. ඊට පස්සෙ අපි හිතන්නේ ම ඇයි අපිට අපි මේ තරම් පමාවෙලා මුණ ගැහුණේ කියලා. හිතන්නෙවත් නැතුව, ඔබ ගැන මටත්, මං ගැන ඔයාටත්, අපිට අපිත් නොදැනුවත් ව ම තමා හිත් බැඳුණේ. හැබැයි ඒ ආදරේ වචනෙන් කියන්න තරම් ඔයාවත් මමවත් ඉස්සර වුණේ නෑ. මොකද අපි දෙන්නට ම යන්න වෙන ම පාරවල් දෙකක්, බහින්න නැවතුම් දෙකක් තියෙන බව අපි තේරුම් ගත්ත නිසා. අදටත් හංගගෙන ආදරේ ඕන ම තැනදි ඕන ම වෙලාවට අපිට අපි ඉන්නවා. ආදරෙයි කිව්ව නම් අසම්මතයි කියල හංවඩු ගහල වැරදිකාරයෝ කරන්න තිබුණා. ඒත් මගේ හිස බරවෙලා දරාගන්න බැරිව ඇහිපිල්ලමකට කඳුළු බරවෙන හැම වේලාවක ම ඔයාගේ උරහිසයි සෙනෙහසයි මං ගාව තියෙනවා. ඔයාට දරාගන්න බැරි විදියට හිස බර වෙද්දි මගෙ උකුළට ඒ හිස වැටෙනකොට කවදාවත් මට බරක් වුණේ නෑ. අපි නමක් නැති මේ බැඳීම සම්මත ද අසම්මත ද කියල තෝරගන්න හදනවා ට වඩා අපි අපි ම වෙලා අපි අතර දුර හඳුනාගෙන ළංවෙලා ජීවත් වුණා. ඒ හින්දා ම කවමදාවත් අපිව අපිට ප්‍රශ්නයක් වුණේ නෑ. එක මොහොතකට හරි හීනෙකින් හරි හිත් බැඳෙනවා අයිතියක් කියන්න බැරි හෙවණැල්ලක් යට. අයිතියක් ලියාගන්න බැරි කෙනෙක්ට හෙවණැල්ලක් වෙලා හරි. කොයිතරම් නෑ කියල විවේචනය කළත් ඇස්වහගෙන මුළු ලෝකයට ම හොරෙන් ඔයත්, ඔයාගෙන් ම ඇහුවොත් උත්තරේ 'ඔව්' කියන එක. ඒක කොයිතරම් ඇත්තක් ද කියනව නම් මේ දැන් මේක කියවන මොහොතෙත් ඔයාට එයාව මතක් වෙනවා. හදවතේ ගැඹුරු ම තැන පුංචි රිදුමක් එක්ක ම ඇස් හීනියට තෙත් කරමින්, ඉතින් ඇයි තවත් හංගන්නේ... ඒ හීනය මෝහනයක ට ජීවත් වෙලා බලන්න සැනසිල්ලක් දැනේවී දුකකුත් එක්ක ම. අපි තේරුම් ගන්න ඕන හැඟීම් වලට අපිව පාලනය කරන්න නොදී අපි හැඟීම් පාලනය කරගන්න ඕන කියන එක විතරයි. එහෙම නොවන බැඳීම් තමා ලෝකයක් ඉස්සරහ අද විවේචනය වෙන්නෙ. ආදරේ කියන්නෙ ම ලබාගන්න ඕන දෙයක් නෙවෙයි. කොන්දේසි විරහිත ව කිසිත් බලාපොරොත්තු නොවී පිරිනැමිය යුත්තකි. " සෙනෙහස උතුරන වදනට සිත් වී ඔය නෙතු අද්දර නවතිනු රිසි වී දැන දැන හිමි නොවනා බව නොදැනී මම තව තව ඔබ වෙත පෙම් කරමී " මට මැරෙන්න ම හිතුණ වාර අනන්‍තයි. ඔයාට කථා කරන්න ඕනමයි කියල දැණුන වාර අනන්තයි. ඒත්, මං ඒ හැම මොහොතක ම එහෙම කළේ නෑ. ඒත් ජීවිතේ අතාරින්න ඕන ම යි කියල මට හිතුණ අන්තිම හැම තත්පරේක ම කෙළවර ඔයා අල්ල ගත්ත මට මාව අතෑරෙන්න නොදී, කථා කරන හිනාවෙන ඔය ඇස් ඉස්සරහ ඇති මහාමේරුවක් තරම් දුර දැනගෙන හඳුනගෙන අපිට අපි තුරුළු වෙලා හිටියා ඔයාට මතක ද, කවුරුත් ම නැති අපි විතරක් ම ඉන්න ලෝකයක. ඔයා මට අයිතිනැති බව දැන දැන ම නොදැනෙනවා වගේ ඒ තත්පර අසුරු සැණින් නිම වුණාට අපිට හුස්ම ගන්න ඒ දේවල් මහමෙරක්. ඉතින් මං කොහොම පෙම් නොකර ඉන්න ද, ඉතින් මං කෝම ඔබ අතාරින්න ද, ඇත්තටම මට අතාරින්න බැහැ ඔයාව, මොකද මං අල්ලගෙන නැතිව අතාරින්නෙ කොහොමද, ආදරෙයි කියල නොකියපු මම ආදරේ නොකරනවා කියල ඔප්පු කරන්නේ කොහොමද.... "ලොවටම රහසේ සිහිනෙක දැවටී ඔබ ළඟ සැතපී මම සුව විඳිමී වරදක් නො කර ම වරදෙහි බැඳුණී සිත සනසාගෙන දුර හිඳ විඳිමී" මේ මුළු ලෝකෙට ම රහසින් තුරුළු වෙලා හිනාවුණා; ඇඬුවා. ඔයාගෙ සුවඳ, ඔයාගෙ හුස්ම මං වින්දා. කවදාවත් දැනුණේ නෑ මේ කරන්නේ වැරැද්දක් කියලා. මානසික සුවයක් දැනෙන සතුටක් දැනෙන හිනාවෙන ජීවත් වෙනවා කියල දැනෙන එක වරදක් ද, කාටද කියන්න පුළුවන් ඒක වරදක් කියලා. කවදාවත් එක් නොවුණත් කප්පරක් බර කෝච්චියක් උස්සං හරිම තැනට ගෙනියන්න රේල් පීලී දෙකකට පුළුවන් නම් ඇයි අපිට බැරි ඒ වගේ ජීවත් වෙන්න. ඔයා කියයි මට කෝච්චියක් පීලි පනිනවනෙ කියල. ඔව් බැඳීම අඳුරගන්නෙ නැතුව අයිතිවාසිකම් කියන්න අයිතිකරගන්න ගියා ම ජීවිතෙත් පීලි පනිනවා. මං මේ කියන්නෙ එහෙම බැඳීමක් ගැන නෙවෙයි. හරියට ම ඔයාගෙයි මගෙයි වගේ බැඳීමක් ගැන. කවදාවත් ඒ නිසා කාටවත් ප්‍රශ්නයක් වුණේ නැහැ. අපි හිනාවුණා, කථා කළා, ඇවිද්දා අපි අපේ සීමාවන් අපි අතර තියෙන දුර දන්නවා. ඉතින් අපි කවදාවත් උත්සාහ කළේ නැහැ නේද ඒ දුර අඩු කරගන්න. කෙනෙක්ට එහෙම හිතුණත් අනිත් කෙනා හරි ලස්සනට ඒක පාලනය කරපු හැටි මතක ද...? මට ඔයා ව ඕනමයි, ආදරෙයි කියල මං කියන්න යනකොට ම ඔයා ඒ දේවල් මඟහැරපු හැටි මතක ද, දුර වැටකඩුලු, තහංචි තේරුම් කරවපු හැටි මතක ද ඔයාට. ඉතින් ඒ නිසා ඒ දුර දැනගෙන දුර ඉදං ළංවෙලා අපි අපිව අදටත් විඳිනවා. පුංචි හිනාවකුත් එක්ක ම. ඉතින්, ආදරේ නොකියා ආදරේ කරන්න අයිතියක් නොහිතා හිතවත් වෙන්න බලාපොරොත්තුවක් නොගෙන බලාපොරොත්තුවක් වෙන්න හරියට ම අපි වගේ.............. සම්මත ද අසම්මත ද කියල මායිමක් නොසොයා ආදරෙන් හුස්ම ගන්න; හුස්ම දෙන්න. මොකද මට සම්මත දේ ඔබට අසම්මත වෙන්න පුළුවන් වගේ ම, ඔබට සම්මත දේ මට අසම්මත වෙන්න පුළුවන්. ඒක ආත්මීය යි. ආයෙමත් කියනවා. මේ මොහොතෙ ඔබට දැනුණ එයා අයිතිකරගන්න නෙවෙයි. එයාට ආදරේ නොකියා ආදරේ කරන්න. ආදරේ මේකයි කියල නිර්වචනය කරගන්න බැරි අපි ආදරේ සම්මත අසම්මත බව තීරණය කරගන්න තරම් කලබල නොවිය යුතු යි. නමුත් පවත්වන ඇතිවන හා ඇති කරගන්නා හැඟීම් ජීවිත සනසවන ඒවා මිස වනසන ඒවා දක්වා වර්ධනය නො කර ගත යුතු ය. කොහොම වුණත් ආදරේ නොකිව්වට මං ඔයාට කොහොමත් ආදරෙයි.... අන්සතු ඔබ වෙත මගෙ හිත බැඳිලා ඔබ ගැන සෙනෙහස හිත තුල පිරිලා සම්මතයෙන් පිට ප්‍රේමෙක වෙලිලා මග හැර යන්නට බැරිලෙස බැඳිලා සෙනෙහස උතුරන වදනට සිත් වී ඔය නෙතු අද්දර නවතිනු රිසිවී දැන දැන හිමි නොවෙනා බව නොදැනී මම තව තව ඔබ වෙත පෙම් කරමී ලොවටම රහසේ සිහිනෙක දැවටී ඔබ ළඟ සැතපී මම සුව විඳිමී වරදක් නොකරම වරදෙහි බැඳුනී සිත සනසාගෙන දුර හිද විඳිමී සෙනෙහස උතුරන වදනට සිත් වී ඔය නෙතු අද්දර නවතිනු රිසිවී දැන දැන හිමි නොවෙනා බව නොදැනී මම තව තව ඔබ වෙත පෙම් කරමී අන්සතු ඔබ වෙත මගෙ හිත බැඳිලා ඔබ ගැන සෙනෙහස හිත තුල පිරිලා සම්මතයෙන් පිට ප්රේමෙක වෙලිලා මග හැර යන්නට බැරිලෙස බැඳිලා සෙනෙහස උතුරන වදනට සිත් වී ඔය නෙතු අද්දර නවතිනු රිසිවී දැන දැන හිමි නොවෙනා බව නොදැනී මම තව තව ඔබ වෙත පෙම් කරමී

NEWS

විභව Unframed | Episode 46 | අන්සතු ඔබ

  • Date: 2022-01-14