Blog

ලුවිස් මැකලම් දාඩියෙන් පෙඟුණ අතකින් පංතිකාමරයේ දොරට සිහින් තට්ටුවක් දැමුවා ය. දැනටමත් ඇයගේ මුවේ කෙල බිඳුවක්වත් නැතිවාක් මෙන් ඇයට දැනෙයි. ඇඟිලිද සුදුමැලි පැහැ වන තරම් තදින් දොරේ අල්ලුව අල්වාගත් ඇය ගැඹුරු හුස්මකින් ළය පුරවාගෙන සෙමෙන් දොර විවර කළා ය. "ඇයි??" භෞතික විද්‍යාවේ සමීකරණයක් පැහැදිලි කරමින් සිටි මැදි වියේ ගුරුතුමා ප්‍රශ්නාර්ථයක් දෙනෙතේ රඳවාගෙන ඇසීය. "දෙවියනි මට මේ අවස්ථාවට මුහුණ දීමට ශක්තිය ලබාදෙන්න" තමාටම මුමුණාගත් ලුවිස් වහාම බෑගයේ වූ ලිපිය අතට ගත්තේ අනෙක් අතේ වූ ෆයිල් කටුව මහපටැඟිල්ලෙන් හා දබරැඟිල්ලෙන් අල්ලාගෙන නවමින් ය. ඇයගේ මුහුණේ වෑයමින් නගාගත් සිනහවක් විය. "මම පාසලට අලුතින් ආවෙ" ඇය තම බැල්ම ගුරුතුමාගේ දෑත් වෙත රඳවාගෙන විදුහල්පතිගෙන් ලබාගත් ලිපිය ඔහු වෙත දිගු කළා ය. ඔහු එය දිගහැර කියවා බැලුවේ ය. මේ මොහොතේ මුළු පංතිය ම තමා දෙස බලාසිටින බව ලුවිස් දනියි. එහෙත් ඇයට හිස ඔසවා බැලීමේ ධෛර්යයක් නැත. "හරි.. ළමයි.. මේ අපේ පංතියේ අලුත් ම සාමාජිකාව. ඔයාව පංතියට හඳුන්වලා දෙන්න කැමති ද?" ගුරුතුමා ඇය දෙසට හැරුණේ ය. ලුවිස්ගෙ භීතියට පත් හදවතේ ගැස්ම මදක් වැඩි විය. එහෙත් ඇය ෆයිල් කටුව තවත් තදින් නවමින් හිතට ධෛර්යය ගෙන පංතිය සිසාරා ක්ෂණික බැල්මක් හෙලුවා ය. විය යුතු ලෙසම සියලු දෙනාගේ ම නෙත් ඇය වෙත ය. කොල්ලන්ගේ මුහුණු තුළ ඇඳී තිබූ අමුතු ප්‍රීතිමත් බැලුම් ඈ දුටුවා ය. ඔවුන් මේ බලා සිටින්නේ සුරූපී තරුණියක දෙසයි ; ඔලිව් පාට සම, ඉඟටියෙනුත් පහලට තෙක් ප්‍රංශ ක්‍රමයට ගෙතූ රන්වන් පාට කෙස් වැටිය, අලුත් ම විලාසිතාවේ ලොකු උපැස් යුවල පිටුපස ඇති නිල්වන් දෑස සහ නිල් සහ අලු නිළ ඇඳුමෙන් සැරසුණු උසට ගැළපෙන මහත ඇති හැඩැති සිරුර. නමුත් ඇයගේ බියෙන් පිරුණු ආත්මය ඔවුන් දකිනවා ඇති ද?? … හදිසියේම පිටුපස ම පේලියේ සිටි එක් තරුණයෙක් වෙත ඇයගේ දෙනෙත නතර විය. ඔහු දෑතේ ම මහපටැගිලි ඔසවාගෙන සිටියේ ඇයව දිරිමත් කරන සිනහවක් මුවේ රඳවාගෙනය. "ඔයාට මේක පුළුවන්" ඔහුගේ දෙතොල සෙලවිණි. එය ලුවිස්ට මහත් සැනසුමකි. "මම ලුවිස් මැකලම්. අලුතෙන් මේ නඟරයට ආවේ ටවුරන්ගා වලින්. මගේ තාත්තා භෞතචිකිත්සක කෙනෙක්. අම්මා මිය ගිහින්" ඇය තරුණයා වෙතම දෑස් රඳවාගෙන පැවසුවා ය. "හොඳයි ලුවිස්. ජේම්ස් කුක් උසස් පාසලට අපි ඔයාව සාදරයෙන් පිළිගන්නවා. දැන් ගිහින් ඉඳගන්න" සිසුන්ගේ මුණු මුණුව යටපත් කරමින් ගුරුතුමා පැවසුවේ ය. ලුවිස්, පිටුපස පේලියේ හිස්ව තිබූ එක ම අසුන වූ අර තරුණයා අසළ වූ අසුන වෙත ගියා ය. "හෙලෝ ලුවිස්. මම ලූක්. ඔයාව මැනුරෙවා නඟරයටත් සාදරයෙන් පිලිගන්නවා" ඔහු සිනහසෙමින් පැවසුවේ ය. ඉතින් ඔවුන්ගේ මිතුදම ඇරඹුනේ එලෙසිනි. ලුවිස් සමාජ භීතිකාවකින් පෙළුණු තරුණියකි. ඇය විශේෂයෙන් ම වඩා හිස් ඉඩක් ඇති ස්‍ථාන, කණ්ඩායම් ලෙස පිරිස් ගැවසෙන ස්ථාන, විදුලි සෝපාන මෙන් ම වාහනයක ගමන් කරන විට ඉන් පිටත බැලීමට පවා බිය වූවා ය. කලින් පාසලේ මෙන් ම මෙම පාසලේදීත් ඇයගේ රූමත් බව නිසා ම බොහෝ දෙනා ඇය හා මිතුරු වීමට උත්සාහ කලත් එය අතහැර දැමුවේ ඇයගේ නිහඬ සහ සමාජශීලී නොවන ගතිගුණ හේතුවෙනි. ලුවිස්ට නම් තමාව තේරුම් ගත් එක ම තැනැත්තා ලෙස පෙනුනේ ලූක් පමණි. ඔහු ඇයව මැනුරෙවා නඟරය පුරාම ගෙන ගොස් සියලු ස්ථාන හඳුන්වා දුන් අතර පාසලේදීත් සැම විට ම ඇයට උපකාර කළේ ය. ඇයගේ විද්‍යාගාර සඟයා වූයේ ද ඔහු යි. "ඔයා අසනීපෙන්ද ලුවිස්??" දිනක් පාසල් විවේකයේදී ලුවිස් අසළට පැමිණි ලූක් ඇසුවේ ය. "ඇයි??" "ඔයාගෙ අතේ බෙහෙත් පෙත්තක් තියෙන නිසයි ඇහුවේ" ලුවිස් වහාම තම දෑත මිට මොලවාගත්තේ අත්ල මත වූ කුඩා ත්‍රිකෝණාකාර බෙහෙත් පෙත්ත සඟවාගැනීමට මෙනි. අනෙක් ළමුන් ආපනශාලාවේ සිටිනාතර ඇය පංතියට ආවේ බෙහෙත් වේල සඳහා වුවත් ඇය එයත් අත තබාගෙන ම කල්පනා සයුරක ගිලී ඇත. බොරුවක් කියා පහසුවෙන්ව ලූක්ගෙන් සත්‍යය සැඟවිය හැක. ඇය මෙතෙක් කලක් තම මානසික තත්ත්වය ගැන සඟවාගෙන සිටියේ මිතුදම නැති වේයැයි සිතාය. නමුත් ඇය වන්නක් වේවායි සිතා තමා සමාජ භීතිකාවෙන් පෙළෙන බවත් ප්‍රතිකාර ලබන බවත් පැවසුවාය. "මේ බස්ප්‍යීරෝන්.මට සෝෂල් ෆෝබියා තියෙන නිසා මනස සන්සුන් වෙන්න මේක බොන්නෙ" එදින පටන් ඔවුන්ගේ මිතුදම තවත් වැඩි විය. අර්ධ කාලීන රැකියා කරමින් තනිව ජීවත් වන ලූක්, කඩවසම්‍ තරුණයෙක් නොවුනද දක්ෂයෙකි. ලුවිස් දිනෙන් දින ම ඔහුගේ පෞරුෂත්වය කෙරෙහි ඇදී ගිය අතර නිසැකව ම ලූක්ට ආදරය කළාය. නමුත් ලූක් වෙතින් එවන් හැඟීමක් පිළිබඳව ඉඟියක්වත් නොවීම ඇයට පුදුමයක් විය. ඇය වේදනාවෙන් සිතුවේ කුමක් වුවත් ඔහු තමා වැනි මානසික ව වැටුණු අයෙක් සමඟ මිතුරුදමෙන් එහාට යමක් සිතීමට අකැමැතිව ඇති බව යි. පියාගේ කාර්යබහුල දිවිය නිසා ඇයට කිසිවෙකුගේ සෙනෙහස දැඩිව අවශ්‍ය ව තිබුණි. මේ අතර ලූක් තම හොඳ ම මිතුරා වූ ඇලෙක්ස්ව ලුවිස්ට හඳුන්වා දුන්නේ ය. ඔහු ද ලුවිස්ට මහත් කාරුණික විය. නඟරයේ වෙනත් පාසලක ඉගෙනගත් ඇලෙක්ස් හා ලූක් අතර වූ බැඳීම පුදුම සහගත විය. "ඔයාලා අතර් තියෙන යාලුකම හරි ම පුදුමයි. ඔය දෙන්න මගේ යාළුවෝ වුණ එක ගැන මං ණයගැතියි" ලුවිස් නිතරම පැවසුවා ය. "ඔයාට තවමත් බයක් දැනෙනවද" දිනක් දීප්තිමත් සිනාවක් අලුපාට දෑසේ රඳවාගෙන ලූක් ඇසුවේ ය. "දැන් ගොඩාක් ම අඩුයි. මට උදව් කරාට ස්තූතියි ලූක්" "හොඳයි එහෙනම්. ඔයා මිස් ටීන් නිව්සීලන්ඩ් පැජන්ට් එකට ඉදිරිපත් වෙන්න" "අනේ ලූක්. මට බැහැ" ලුවිස් පැවසූයේ පුදුමයෙනි. "ඇයි බැරි. මේක ඔයාට හොඳ අවස්ථාවක්. ප්ලීස් ලුවිස්. ඔයා ලස්සනයි, දක්ෂයි, ඒ වගේ ම නිර්භීතයි. මං වෙනුවෙන් මේක කරන්න" "හොඳයි එහෙනම්" ලුවිස් පැවසූ යේ ලූක් වෙනුවෙන් මෙය කෙසේ හෝ කරන බලාපොරොත්තුවෙනි. ඒ අවස්තාවේ ලූක් කෙතරම් තදින් ලුවිස්ව වැළඳගත්තේ ද කිවහොත් ඇයට මහත් සතුටක් දැනුණි. කාලය ගතවිය. ලුවිස් තරඟයේ අවසන් වටය තෙක් ම තේරී ආවා ය. අවසන් තරඟයට පෙර දින කිහිපයේ ලූක් තුළ මහත් වෙනසක් තිබෙන බව ලුවිස්ට වැටහුණි. ඇයගේ බලවත් පෙරැත්තය අවසානයේ ඊට හේතුව පවසන්නට ලූක් එකඟ වූයේ ය. "ඇලෙක්ස් යන්න ගියා" "ඇලෙක්ස් ගියා????" "ඔව් ලුවිස්. එයා ක්‍රයිස්චර්ච් ගියා.මට..මට එයා නැතුව ගොඩක් පාලුයි ලුවිස්" "ඒත් අපිට එයාට කතා කරන්න පුළුවන් නේද. නිවාඩුවකට එයාව බලන්න යන්නත් පුළුවන්නෙ. ඕකට ඔච්චර දුක් වෙන්නෙ ඇයි. ඔයාලා හොඳ ම යාළුවො නිසා හිතට වේදනා ඇති. මටත් දුකයි. ඒත්.." "නැහැ ලුවිස්" ලූක් ඇයට බාධා කරමින් පැවසුවේ ය, "මේක වෙනස්. එයා මගෙන් වෙන්වුනා. ආයෙත් අපි මුණ ගැහෙන්නෙ නැති වෙයි. ප්ලීස් මාව තේරුම් ගන්න. මාව පිළිකුල් කරන්න එපා" ලූක් මේ පවසන්නේ මොනවාදැයි ලුවිස් පුදුමයෙන් අසා සිටියා ය. එක්වරම ඇයගේ මනසේ විදුලියක් මෙන් අදහසක් ඇතිවී නැතිවී ගියේ ය. "අපි යාලුවො විතරක් ම නෙවෙයි ලුවිස්. එයා මගෙ බෝයිෆ්‍රෙන්ඩ්. මගෙ පාට්නර්. මං එයාට ගොඩක් ආදරෙයි. මං ඔයාටත් ආදරෙයි. ඒත් ඔයා කොල්ලෙක් නෙවෙයිනෙ. මම වෙනස් කෙනෙක් ලුවිස්" ලුවිස්ගේ හදවත කැඩී යනවාක් මෙන් ඇයට දැනිණි. දැන් ඇයට යම් යම් සිදුවීම් පැහැදිලි වේ. ඇලෙක්ස් සහ ලූක් අතර තිබූ ඒ දැඩි ආදරණීය බැඳීම. ඇයගේ දෑස් කඳුලින් පිරුණි. ඇය දුරකතනය දැඩිව ග්‍රහණය කරගත්තේ ලූක්ව වැළඳගැනීමට නොහැකිවීම ගැන දුක් වෙමිනි. "මට ඔයාගෙ ළඟ ඉන්න තිබුන නම් අනේ. මං අද ම එන්නම්. ඔයා කලබල නොවී ඉන්න" එහෙත් ලූක් එ‍යට එකඟ නොවූ අතර ම කෙසේ හෝ අවසන් දිනයේද ඇය ඉදිරිපත් විය යුතු බව පැවසීය. ලූක් පැවසූ ලෙසට ම ලුවිස් ජයග්‍රහණය කළාය. ඇයගේ ඡායාරූප පුවත්පත් සහ අන්තර්ජාලයේ පළවිය. නමුත් ඇය නැවත මැනුවෙරා වෙත පැමිණියේ නැත. "එයා තරඟයෙන් ලැබුණු මුදලත් තව එයාට අයිති මුදලකුත් අරගෙන ගිහින්. එයා මට කිව්වා එයා ගොඩක් ආදරය කරන කෙනෙක් වෙනුවෙන් දෙයක් කරන්න ඉඩදෙන්න කියලා. ඒ වගේ ම එයා මගෙන් සමාව ඉල්ලුවා. මට මේ මොකුත් ම තේරුම් ගන්න බැහැ" ලුවිස්ගේ පියා ලූක්ට පැවසූයේ ඔහු අත ලියුම් කවරයක් තබමිනි. "එයා ඕක මට එවලා තිබුණා. ඔයා ආවම ඔයාට දෙන්න කියලා" ලූක් වහාම එය විවරකොට බැලුවේ ය. එහි වූයේ චෙක්පතක් සමඟ වූ සටහනකි. ආදරණීය ලූක්, මගේ තාත්තට පවා මට සමීප වෙන්න බැරිවුනා. ඒත් ඔයා මට ලොකු ම ධෛර්යයක් වුණා. මට ඇලෙක්ස් වෙන්න බැහැ. ඒත් ඔයා මටත් ආදරෙයි කිව්වනෙ. මටත් ඔයා වෙනුවෙන් යමක් කරන්න දෙන්න. මොකද මමත් ඔයාට ගොඩක් ම ආදරෙයි. ඔයා වෙනස් කෙනෙක් වුනත් මට වැඩක් නැහැ ඒක.ඔයා මේ චෙක් එකෙන් සල්ලි අරගෙන ටෙකාපො එන්න. දකුණු දූපතට. ඔයාට මතකනෙ අපි ටෙකාපො විල බලන්න යන්න කතා වුණා දවසක්. යහපත් එඬේරාගෙ ගල් පල්ලිය ළඟට එන්න. ලුවිස් එහි, පැමිණිය යුතු දිනයක් ද සටහන් කර තිබුණි. මාස දෙකක කාලයක් අසීරුවෙන් ගෙවාගත් ලූක් ටෙකැපො විල වෙත යාමට පිටත් විය. මේ වන විට ඇලෙක්ස්ගේ වෙන්වීමේ දුක තුනී වී ගොස් තිබූ අතර ලූක් සිටියේ ලුවිස් පිලිබඳව තෝන්තුවාවෙනි. එය නොවැම්බරයේ අග ලස්සන දවසකි. නිල් පැහැති විල අවට දම්, රෝස සහ නිල් පැහැයන්ගේ විවිධ ආකාරයන්ගෙන් යුත් පාටින් ලුපින් මල් පිපී තිබුණ අතර එය මිහිපිට දෙව්ලොවක් මෙන් සුන්දර දසුනක් විය. ලූක් පල්ලිය අසළට වී මද වේලාවක් සිටියේ ය. ඔහු වෙතට ඇවිදගෙන එන තරුණයෙක් දුටු ලූක් දුරකතනයේ වූ ලුවිස්ගේ ඡායාරූපයක් ගත්තේ ඇය දුටුවාදැයි අසන්නට ය. කිසිත් නොකී තරුණයා ඔහු අත පබළු මාලයක් තැබී ය. ලූක් එය මඔරි වෙළඳ සැලකින් මිලදීගෙන ලුවිස්ට දුන් ත්‍යාගයකි. "කොහෙන්ද මේක??" ලූක් තරුණයාගේ සියුමැලි මුහුණ දෙස විමසිල්ලෙන් බැලුවේ ය. ඔහු නලලට ආ දෑසට ද වැටී තිබූ රන්පැහැ කෙටි කොණ්ඩය අතැඟිලිවලින් පස්සට කරගත් විට උපැස් යුවළ පිටුපස නිල්වන් දෑස පැහැදිලිව පෙනෙන්නට විය. "මගේ ජිවිතේ මට ලොකුම ශක්තියක් වුණ සහ මං ආදරය කරන කෙනා වෙනුවෙන් කරන්න පුළුවන් වන් දෙය තමයි මං කරේ. ඔයා මාව පිළිඟන්නවද ලූක්?" "ලුවිස්????. දෙවියනේ ඔයා.." "ඔව්. මේක පොඩි වෙනසක් විතරයි. මට සම්පූර්ණයෙන් ම කොල්ලෙක් වෙන්න අවුරුදු පහක්වත් යයි. මට ඇලෙක්ස් වෙන්න බෑ. ඒත් මං ඔයාට හැමදාම ආදරෙයි" ලූක්ගේ දෑස් කඳුලින් පිරී ගිය අතර කුමක් පවසන්නදැයි ඔහුට සිතාගත නොහැකි විය. ඔහු තරුණයාව තදින් වැලඳගත්තේ ය. "ලුවිස් … ඔයා මොකක්ද මේ කරගත්තෙ… ඔයාගෙ ලස්සන ජීවිතේට ඇයි මෙහෙම කරේ??" "ඒ දේවල්වලින් වැඩක් නැහැ. මට ගොඩක් ම වටින්නෙ මාව තේරුම් ගන්න එක විතරයි. හැමදාම අතේ ෆයිල් කටුවක් ගුලිකරගෙන හිටිය මට ඔයා නිසා අලුත් ජීවිතයක් ලැබුණා. මං ගොඩක් ආත්මාර්ථකාමී යි. ඔයා තමයි මගෙ බිය නසන මැජික් එක. ඔයා නිසා මං පරණ ජීවිතය කැමැත්තෙන්ම අතෑරියා" ලූක් හැඬුම් මුහුණින් යුතුව තවත් ලුවිස්ව වැළඳගත්තේ ය. "මමත් ඔයාට ආදරෙයි ලුවිස්. හොඳයි එහෙනම්. නම වෙනස් කරන්න ඕනි නෑනේ" ලූක් තරුණයාගේ දෑසට එබෙමින් සිනාසෙමින් ඇසුවේ ය. "මගේ දෙමව්පියො මෙහෙම වෙන බව දැනගෙන තමයි මට කෙල්ලෙක්ටයි කොල්ලෙක්ටයි දෙන්නෙක්ටම ගැලපෙන නමක් දාලා තියෙන්නේ" ලුවිස්ගේ සිනා හඬ ලුපින් මල් පිසඟෙන ආ සුළඟට මුසු වී ගියේ ය.