Blog

2010 වර්ෂයේ Cannes සිනමා උළෙලේ දී හොඳම චිත්‍රපටය සඳහා "Palme d'Or" සම්මානය දිනාගත් තායිලන්ත ජාතික සිනමාකරුවෙකු වන "Apichatpong Weerasethakul" ගේ "Uncle Boonmee Who Can Recall His Past Lives" චිත්‍රපටයේ කතා තේමාව ඇසුරිනි. ---------------------------------------------------------------------- - පාරමී, මෙහෙට තාම වැස්සක් වැටුණෙ නෑ - ඉතින් ඔයාට කොහොමද? හොඳින් ඉන්නවා කියල හිතනවා. ගියපාර එවපු ලියුමට උත්තරයක් ලැබුණෙ නැති වුණත් මේක එවන්න හිතුවෙ ඔයාගෙ අලුත් විස්තර දැනගන්න මම ආසාවෙන් බලාගෙන ඉන්න හින්දා. ඔයාලගෙ කැම්පස් එක ආපහු පටන් ගන්න යනවා කියල නැන්දා කිව්වා. කොහොම වුණත් පරෙස්සමෙන් ඉන්න එක හොඳයි. පාඩම් කරන වැඩ එහෙම මග ඇරගන්නෙ නැතුව දිගටම කරගෙන යන්න. මට කලින් පාර කියන්න අමතක වුණානෙ. අර අපි දෙන්න හිටවපු සේපාලිකා ගහත් පෑවිල්ලට මැරිල ගියා. තාත්තා නම් කියන්නෙ තව කාලයක් යනකන් වැස්සක් එන එකක් නැහැ කියලා. ඔය පැත්ත නම් හරිම ලස්සනයිලු නේද? මම එන්න කලින් ඔයාට කියල තියන්නම්. ගලහ හන්දියේ ඉඳන් පාර කිව්වොත් මට හොයාගෙන එන්න පුළුවන්. ---------------------------------------------------------------------- - අම්මා - "මට තවත් පියාඹන්න අමාරුයි." "එහෙනම් අපි ටිකක් නතර වෙලා ඉඳලා යමු. අතන දේවදාර ගහක් තියෙනවා. එන්න." "මම කොච්චර වේදනාවෙන් හිටියත් ඔයා ළඟින් ඉන්නකොට මට බයක් දැනෙන්නෙ නෑ." "අපේ අලුත් කූඩුව හදල තියෙන තැන දැක්කම මට තියෙන ආදරේ වැඩිවෙයි. එතන පහලින් ලස්සන දොල පාරකුත් ගලාගෙන යනවා." "ඒක දකිනකන් මටත් ඉවසිල්ලක් නෑ" "ඔයාට හැම දේකටම ඉවසිල්ලක් නෑනෙ. හහ්!" "ම්ම්හ්..." ---------------------------------------------------------------------- - දම් සභා මණ්ඩපය - සුදස්සන පොඩි හාමුදුරුවන්ගේ ප්‍රශ්න සංසාරය වගේය. කෙලවරක් නැත. "දුක ඇතිවෙන්නෙ යමක් නිත්‍ය නොවීම නිසාද? නැත්නම් අපි කැමති විදිහට නොපැවතීම නිසාද?" මාර්ගඵල ලාභියෙකු නොවන රාහුල ලොකු හාමුදුරුවන්ගේ පිළිතුරු අවිනිශ්චිතය. එහෙත් උන්වහන්සේ තමාගේ නොදන්නාබව දැනගත් අයෙකි. නිවන් මග ආරම්භ වන්නේ විශ්වාසයෙන් නොව අවිශ්වාසයෙනි. කුතුහලයෙනි. "ඔය අනිත්‍ය අනිච්ච ගැටලුවට තවමත් වාද විවාද කෙරෙනවා. මගේ දැනට තියෙන අදහස තමයි නිත්‍ය නොවීම නිසා දුක ඇතිවෙනවා කියන එක. මොකද අනිච්ච කියල ගත්තම අපි කැමති විදිහට මේ ලෝකයේ වස්තු පවතින්නෙ නැති නිසා දුක ඇතිවෙනවා නම් ඒ කියන්නෙ වක්‍රාකාරයෙන් අපි කැමති විදිහට නොපවතින වස්තු මේ ලෝකයේ තියෙනවා කියන එක. ඒක එතකොට බොහොම සියුම් ආකාරයෙන් ශාස්වතවාදයට සම්බන්ධ වෙනවා. සුදස්සන තව ඕක ගැන හොයන්න. ඉගෙන ගන්න. සෙවීම තමයි බොහොම වැදගත්. නැවැත්මක් තියෙන්නෙ පැවැත්මක් තියෙන කෙනෙකුට පමණයි." ---------------------------------------------------------------------- - ස්වර - "සර් අපි කලින් දැනගෙන හිටියෙ නෑ මෙහෙම දෙයක්. කොන්සර්ට් එක හිතුවටත් වඩා හොඳට කරගෙන ආවා. ඕඩියන්ස් එක ගල් ගැහිලා වගේ බලාගෙන හිටියෙ." "එයාගෙ සිහිය නැති වෙනකොට මොකක්ද ප්ලේ කර කර හිටියෙ?" "Giorni Dispari, ඒක මැඩම් ආසම එකක් නේද සර්?" "එයා ආස ඒකට විතරයි."