Blog

- Is Love Enough Sir ? - ආදරය, විවාහය නිසා හීන බිදුණු කෙනෙකුගේ හීන වලට පණ දෙන්න පුළුවන් වෙන්නෙ ආයෙමත් ආදරයකට කිව්වොත්, ඔව්...... ඒ වගේ අවස්ථාවක දී එහෙම හමුවෙන කෙනා මොන සමාජ පසුබිමක හිටියත් අපිට වැඩක් නැති වේවි, Is Love Enough Sir? 2018 වසරේ තිරගත වුණ මෙම චිත්‍රපටය අධ්‍යක්ෂණය කරනු ලැබුවේ 'රොහෙනා ගේරා' විසින් ය. ගැඹුරු තේමාවක් නොවුනත්, ඉතා සරල සුන්දර මානූෂීය හැගීම් හා සමාජයේ පවතින උසස් - පහත් භාවය මෙම චිත්‍රපටය මගින් සීරුවට නිරූපණය වෙනවා. කතා නායිකාව 'රත්නා' ය. ඇය වැන්දඹුවක්. අවුරුදු 19 දි පමණ ඇයට ඇගේ ඉගෙනීම මගින් නතර කරලා විවාහ වෙන්න සිද්ධ වෙනවා. මාස දෙකකින් ඇගේ සැමියා මිය යනවා. ඒ හේතුවෙන් ඇයට විවාහ මංගල්‍යයකටවත් සහභාගි වීමට නොහැකි අයුරින් ගම්බද පරිසරය තුළ ඇය අසරණ වෙනවා. 'Your life is over' ග්‍රාමීය මිනිස්සුන් ඇය වගේ වැන්දඹු කාන්තාවන්ට කියන්නෙ එහෙම. නමුත් ඇය හැමවේලාවෙ ම විශ්වාස කරපු දෙයක් තියෙනවා. “ Life doesn' t end” තමන්ගේ සහෝදරියගේ අධ්‍යාපන කටයුතු වලට හා නිවසට හයියක් වෙන්න හිතාගෙන ඇය දැන් සේවිකාවක් ලෙස කටයුතු කරන්නේ අශ්වින්ගේ නිවසේ ය. අශ්වින් යනු ඉහළ වත්කමක් ඇති නමුත් සරල ජීවිත රටාවක් ගත කරන උගත් කඩවසම් තරුණයෙක්. ඔහුගේ විනීතභාවය චිත්‍රපටිය පුරාවට ම හොඳින් පෙන්නුම් කරනවා. විශ්වාසය කඩ කරපු තමන්ගෙ පෙම්වතිය නිසා ඔහු මහත් සිත් තැවුලෙන් දවස් ගත කරනවා. රත්නා තමන් ට අදාළ රාජකාරිය නොපිරිහෙලා ඉටු කරන අතර ඇය ඇගේ හීනය වන විලාසිතා නිර්මාණකරණය ඉගෙන ගැනීම ට පටන් ගන්නවා. නමුත් ජීවිතය හිතන තරම් රත්නා ට ලේසි වෙන්නේ නැහැ. මෙහෙම ගලාගෙන යද්දි අශ්වින් තේරුම් ගන්නවා; ඔහුගේ කලින් පෙම්වතිය සමග පවා ඇති නොවුණු ආකාරයේ විශ්වාසවන්ත බවක් තමන්ගේ සේවිකාව සමග ඇති වී ඇති බව. ඇයගේ නිර්භීත හා ස්වාධීන බවට මෙන් ම අව්‍යාජ සිනහව ට ද ඔහු ඇළුම් කරන බව ඔහු වටහා ගන්නවා. "This chic is sweet, she is there for you. but she is your maid." "Put that aside for one moment. She is the only one who really understands me." අශ්වින්ගේ මිතුරා නියෝජනය කරන්නේ අශ්වින්ගේ ඉහළ පැළැන්තියෙන් ඔහු ට නඟන ප්‍රශ්න මාලාවේ සරල ම අවධිය. නමුත් අශ්වින්, රත්නා පිළිබඳ ව අවංක අදහසින් ඉන්නවා. අශ්වින් හා රත්නා අතර ආදර සම්බන්ධයක් ඇති වීම කෙසේවෙතත් පවත්වා ගෙන යාම බොහෝ අසීරු වන්නේ රත්නා ට යි. තමන්ගේ ඉහළ පැළැන්තියේ ස්වාමියාගේ පාර්ශ්වයෙන් පමණක් නොව තමන්ගේ නිවසින් ද දෝෂාරෝපණය ට ලක් වෙන්නේ ද රත්නා ය. මෙය තේරුම් ගත් ඇය මේ කිට්ටු සම්බන්ධතාවය අකමැත්තෙන් හා දුකින් වුව ද උපන් ගෙහිම මරා දමන්න ට කටයුතු කරනවා. ඒ සඳහා ඇය කරන්නේ තමන් සේවය කරපු නිවස හා අශ්වින් හැර යාම. අවසානයේ දී, කොතරම් දුරින් සිටියත් රත්නාගේ ජීවිතයේ සිහිනය වුණු විලාසිතා නිර්මාණකරණය ට දොරගුළු විවර කරල දෙන්නේ අශ්වින්. හිතේ තියෙන සතුට හා කෘතගුණ දක්වන්න ඇය නැවත අශ්වින් සොයා තමන් සේවය කළ නිවස ට පැමිණියත් ඔහු නිවස හැර දා ගොසින්. චිත්‍රපටය අවසානයේ නොහිතන විදිහට දුරකථන ඇමතුමක් රත්නා ට ලැබෙනවා. "හෙලෝ, රත්නා" . . . . . මෙතෙක් කල් "සර්" ලෙස ඇමතූ ඇය දැන්; "අශ්වින්" ඉතා තාත්වික හා විශිෂ්ඨ රංගනයක් ඉදිරිපත් කරන තිලෝත්තමා ශෝම්, 'රත්නා' ට පණ පොවන අතර අශ්වින් සඳහා ඉතා විශිෂ්ට රංගනයක් ඉදිරිපත් කරන්නේ 'විවේක් ගෝම්බර් ' ය. මෙම චිත්‍රපටයේ පසුබිම් සංගීතය ද සරල හා ඉතා මිහිරි ය. 7.7 ක IMDB අගයක් ඇති මෙම හින්දි චිත්‍රපටය, මිනිත්තු 99 ක් පුරා ගලා ගෙන යයි.