Blog

අවසන් වරට කළ පෙම් සටන ළඟ මා පැරදුනේ අවසන් වසර මා හා ගෙව්ව පෙම අවසන් වුනේ සරසවි උයන තනි වූ දිනෙක මා එහි තනි වුනේ විඳි පෙම් සුවඳ මහවැලි ඉවුර ළඟ මිහිදන් කළේ විඳි පෙම් සුවඳ මහවැලි ඉවුර ළඟ මිහිදන් කළේ නුඹ හා ගෙව්ව මොහොතක සුවය හන්තානට වැඩි ගිනිගත් හදට රාගී සුවඳ දළු දැම්මා නිති වරහන් නොමැති ආදර ගීය නුඹ ගැයුවේ බැඳි නුඹ කළ පෙමට මා දුන් දුක ම දැන් මා විඳවමි නුඹ කළ පෙමට මා දුන් දුකම දැන් මා විඳවමි අවසන් වරට කළ පෙම් සටන ... මල්වර නැකත වැරදී උන්න ඇය හා මා බැඳි සංවර සසර ළඟ මා නිරය මැව් බව මා දනී පූජාසනය සේ මා දුටුව නුඹට ම එරෙහි වී තව මල් පිපෙන තුරු ළඟ උන්න කාලය වැරදුනි තව මල් පිපෙන තුරු ළඟ උන්න කාලය වැරදුනි අවසන් වරට කළ පෙම් සටන ... ගායනය - සනුක වික්‍රමසිංහ  සංගීතය - සනුක වික්‍රමසිංහ පද රචනය - මනුරංග විජේසේකර  ............................................................. පේරාදෙණිය සරසවිය තරම් ලාංකේය ගීත රචකයන්ගේ අවධානය ට පාත්‍ර වූ වෙනත් විශ්වවිද්‍යාලයක් නැත. අතීතයේ සිට ම මේ දක්වා ම පේරාදෙණිය සරසවිය වටා කවි, ගී පමණක් නොව චිත්‍රපට නාට්‍ය වැනි සියලු ම කලාංගයන් පෝෂණය වී ඇත්තේ සරසවිය පුරාවට ඇති පාරිසරික ආකර්ෂණය හා එකී පාරිසරික ආකර්ෂණය තුළින් මතුවන්නා වූ හැඟීම් සමුදාය යැයි කියතොත් නිවැරදි ය. එසේ පේරාදෙණිය සරසවිය පිළිබඳව මෑත භාගයේ මනුරංග විජේසේකර කලාකරුවා අතින් ජීවය ලැබූ තවත් එක් අපූර්ව ගීතයක් ලෙස 'අවසන් සටන' ගීතය හැදින්වීමට හැකි යි.  ප්‍රේමය යන්න පිළිබඳව එකිනෙකා අතර ඇත්තේ එකිනෙකට හාත්පස වෙනස් වූ අර්ථකථනයන්. එම අර්ථකථනයන් බොහෝ විට ඒ ඒ පිරිස් ප්‍රේමය පිළිබඳව ලැබූ අත්දැකීම් වලට සාපේක්ෂ වෙයි. ඇතමෙක් ප්‍රේමය යන්න හුදෙක් ම වර්ගයාගේ පැවැත්ම උදෙසා මොළයෙන් ලබා දෙන සරල උත්තේජනයක් පමණක් ම බව නිර්වචනය කිරීමට හැකි යි. එවිට ප්‍රේමය යන්න තුළ සැබවින්ම ගැබ්ව ඇත්තේ රාගික හැඟීමක් ද? රාගයකින් තොර ප්‍රේමයක අවශ්‍යතාවය ඇත්තේ රෝගීන්ට බව සමාජය තුළ මතයක් පැවතුනත්, සැබෑම ප්‍රේමයකට රාගික අවශ්‍යතාවයක් සංතෘප්ත කර ගැනීම අත්‍යාවශ්‍යම ද? එසේත් නැතිනම් ආදරයෙන් තොර වූ රාගයක් තුළ තම ප්‍රේමණීය අවශ්‍යතාවයන් සපුරා ගැනීමට හැකි වේද?  සත්‍ය ලෙස ම රාගයකින් තොර ගැඹුරු ප්‍රේමයක් ඇතිවීමට හැකි යි. රාගික අවශ්‍යතාවයන් සංතෘප්ත කර ගැනීමකට ම වඩා පියවරක් ඉදිරියෙන් සිටින ආදරයක් ඇති වීමට නම් එම ආදරය හුදෙක් එකිනෙකා තේරුම් ගැනීම, ගෞරව කිරීම හා විශ්වාස කිරීම මත ගොඩනැගිය යුතුම යි. ආදරය හා රාගය යන්න පටලවා ගත් විට මෙන්ම, තම රාගික ආකර්ෂණය ප්‍රේමය යැයි වරදවා වටහා ගැනීම තුළ ද සබඳතාවන් තුළ බොහෝ පළුදුවීම් ඇති වීමට හැකි බව මනාව පසක් කිරීමට මෙකී ගීය හේතු වී ඇත. මෙම ගීතය පිළිබඳව සිදු කරනු ලබන අර්ථ විග්‍රහයේ දී පෙම් සුව හා රාගී සුව අතර වන සටනක් හා ඒ තුළින් මතු වන හද කම්පා කරවන තරම් වූ පණිවිඩයක් ද රාගය හා ප්‍රේමය යන්න ඉතා සූක්ෂම ලෙස ඉරකින් බෙදා වෙන් කිරීමට දරා ඇති උත්සහය ද ඇගයීමට බඳුන් කළ යුතුම ය.  "නුඹ හා ගෙව්ව මොහොතක සුවය හන්තානට වැඩි ගිනිගත් හදට රාගී සුවඳ දළු දැම්මා නිති වරහන් නොමැති ආදර ගීය නුඹ ගැයුවේ බැඳි නුඹ කළ පෙමට මා දුන් දුක ම දැන් මා විඳවමි නුඹ කළ පෙමට මා දුන් දුක ම දැන් මා විඳවමි" තරුණයාගේ පාපොච්චාරණය අනුව ඔහු ගෙන එන්නේ, තමා පෙම් කළ තරුණිය හා ගෙවා දමන ලද මොහොතක් වුව ද ඔහුට හන්තානටත් වඩා වැඩි සුවයක් ගෙන ආ බව යි. ඒ අනුව ඔහු රාගයෙන් තොර වූ පිවිතුරු පෙමක් තුළ සත්‍ය වශයෙන් ම තෘප්තිමත් සුවයක් අත් විඳ ඇති බවට ගීතය රසවිඳින්නාට පසක් වෙයි. නමුත් ඔහුගේ සිත තුළ දළු දමමින් පැන නැඟි රාග ගින්න සංසිඳුවීමෙහි ලා එකී පිවිතුරු ප්‍රේමයට හැකිවී නොමැති බවට ද ගීතය තුළින් අපූර්ව ලෙස ගම්‍යමාන වෙයි. රාගයෙන් පිරී ගිය හිතකට වරහන් නොදමා ම ගයන ආදර ගීයක් පමණක් ප්‍රමාණවත් නො වනුයේ ඉදුණු දෙළුම් කෑමේ දොළදුකෙන් පසු වන ස්ත්‍රියක් කෙතරම් ඉදුණු මී අඹ කෑව ද ඇයගේ දොළදුක් සංසිදුවීමට නොහැකි නිසා බව උපුටා දැක්වීම සුදුසු ය. එසේනම් ඔහුට ආදරයක් පමණක් ම අපේක්ෂා කළ හැකි සබඳතාවයකින් ඔහුට තම ගිනි නිවා ගැනීමට හැකි වන්නේ නැත. ඒ අනුව ඔහුට ඇති එක ම විකල්පය වන්නේ තම ප්‍රේමයට පිටු පෑම ය. එසේත් නැතිනම් 'විඳි පෙම් සුවය මහවැලි ඉවුර ළඟ මිහිදන් කිරීමට' ය.  "මල්වර නැකත වැරදී උන්න ඇය හා මා බැඳි සංවර සසර ළඟ මා නිරය මැව් බව මා දනී පූජාසනය සේ මා දුටුව නුඹට ම එරෙහි වී තව මල් පිපෙන තුරු ළඟ උන්න කාලය වැරදුනි තව මල් පිපෙන තුරු ළඟ උන්න කාලය වැරදුනි" කථකයාගේ පාපොච්චාරණය තුළ තවදුරටත් පැහැදිලි කරනුයේ ඔහු තමාගේ ප්‍රේමය මිහිදන් කරමින් තමාගේ සිතේ ඉල්ලීමට සරිලන සැපයුමක් ලබා දීමට කටයුතු කර ඇති බවකි. උක්ත පද පෙළ හරහා හැඟී යන එම පාපොච්චාරණය තුළ තවදුරටත් තරුණයා තමා සිදු කරනු ලැබූ ක්‍රියාව පිළිබඳව කිසිසේත් ම තෘප්තිමත් නොවන බවක් පෙනේ. ඔහුට යම් තැනක් වැරදී ඇත. එනම්, තමාව පූජාසනයක් ලෙස දකිමින් තමාට අවංක වූ ප්‍රේමයක් පිදූ තම පෙම්වතියට ද්‍රෝහී වෙමින්, 'තව මල් පිපෙන තුරු' එනම් වෙනත් සබඳතාවයන්වල සතුට සැනසුම සොයා ගිය ඔහුට පසුතැවීමක් පමණක් ඉතිරි වී ඇත.  සත්‍ය වශයෙන් ම අවංක සිතින් කරන ප්‍රේමයකට ද්‍රෝහි වීම මෙලොව තුළ සිදුකිරීමට හැකි විශාල පාපයක් වන්නේ ම ය. එය නිරය මවා ගැනීමකි. අප විසින් පළුදු කරන මනුෂ්‍ය සිත් තුළ ඇති හැඟීම් යළි කිසිදා පෙර තිබූ ලෙස සුව කිරීමට නොහැකි ය. එබැවින් මනුෂ්‍ය සිතක් රිදවීම මෙන් ම බලාපොරොත්තු කන්දකට ද්‍රෝහී වීම මෙලොව කිරීමට හැකි විශාල ම පාපී කර්මයකි. මේ ආකාරයේ ක්‍රියාවක් කිරීම තුළින් කෙදිනක හෝ පසුතැවිලි වීමක් ඉතිරි වෙයි. සිතක් තුළ ඇති වෙන එකී පසුතැවීම ද පහසුවෙන් ඉවත් කිරීමට හැකි දෙයක් නොවේ. තරුණයා ද එසේ ගීතය පුරාවට ම පසුතැවීමකින් යුතුව තම හැඟීම් ඉදිරිපත් කරයි. තමන්ට ලැබුන අවංක ආදරයේ වටිනාකම ඔහුට වැටහී ඇත්තේ එය තමාගෙන් දුරක ගිය පසු ය. ඔහුගේ රාගී සිත ඔහුව ඒ තරම් අන්ධභාවයට පත් කොට ඇත. එබැවින් තරුණයා ගීතය පුරාවට තමාටම ශාප කර ගැනීමක් වැනි මනෝභාවයකින් පසුවන බව හැඟී යයි. ගීතය පුරාවට ම තරුණයාගේ මෙකී විලාපය හෙවත් පසුතැවිලි වන මනෝභාවයන් ඉතා සූක්ෂම ලෙස හා සාර්ථක ලෙස නිරූපණය කොට ඇති අතර එකී හැඟීම් සමුදායන් නිරූපණය කිරීමෙහි ලා නූතන පරපුරේ දක්ෂ තරුණ කලාකරුවෙකු වන සනුක වික්‍රමසිංහයන්ගේ හඬ හා සංගීතය සුසංයෝජනය අපූර්ව ලෙස හේතු වී ඇති බවට අවසාන වශයෙන් කිව යුතුම ය.