Blog

තනි යහන මගේ සිතට ඔබේ නොපෙනේ ද ප්‍රියේ මේ රාත්‍රියේ සෝ ගිනි ඇවිලේ විරහී හදෙ හී  ඔබට පිදූ පෙමිනී  ප්‍රේමය නම් රසඳුනෙන් දොවා මෝහන මන් මද හැඟුම් මවා // ආලයේ අමා මිහිරේ ඔබ ළමැදේ සුව යහන සදා  ඔබ ළමැදේ සුව යහන සදා  සෝක සුසුම් මතකයෙන් ගලා පාළු යහන් ගැබ ගිලන් වෙලා // වේදනා නිවා මහදේ යළි ඔබගේ රුව දකින තුරා යළි ඔබගේ රුව දකින තුරා  තනි යහන මගේ සිතට ඔබේ නොපෙනේ ද ප්‍රියේ මේ රාත්‍රියේ සෝ ගිනි ඇවිලේ විරහී හදෙ හී  ඔබට පිදූ පෙමිනී  ගායනය: සශිකා නිසංසලා  සංගීතය: රෝහණ වීරසිංහ  ගී පද: කුලරත්න ආරියවංශ මිනිසා තුළ ඇති වන සන්තානගත හැඟීම් අතුරින් වඩාත් සංවේදී වූ හැගීමකි ප්‍රේමය.ගීත සාහිත්‍යය තුළ ප්‍රේමය , ආදරය යනාදී තේමාවන් ඔස්සේ ගීත රචනා කිරීම සඳහා වැඩි අවධානයක් යොමු කරනුයේ ඒ නිසාම ය. ප්‍රේමය එක් අතකට ජීවිතය ජීවත් කරවන ගාමක බලයකි. ජීවිතය පවත්වාගෙන යාමට අභිප්‍රේරණයකි. අනාගතය පිළිබඳව විශ්වාසය ඇති කරන බලාපොරොත්තුවකි. ප්‍රේමය අත් විඳින්නවුන්ට වචනයේ පරිසමාප්ත අර්ථයෙන්ම එය අපූර්ව වූ ස්මරණීය අත්දැකීමකි.ස්ත්‍රියක සහ පුරුෂයෙකු අතර ඇතිවන ප්‍රේමය ඔවුන්ට ඔවුන් හිමිවීමෙන් අවසන් වේ ය යන්න ප්‍රේමයෙන් බැඳුණු යුවලකගේ ඒකායන ප්‍රාර්ථනයයි.නමුත් සෑම පෙම්කතාවකම අවසානය හිමිවීම ම නොවේ. ඔවුන් එකිනෙකාට අහිමිවීමෙන් අවසන් වන ප්‍රේම කතා ද ඕනෑ තරම් තිබේ.ප්‍රේමය පිළිබඳව ලියවුණු ගීත වලට වඩා විරහව පිළිබඳ ගීත ලියැවී ඇත්තේ ද, ලියවෙන්නේ ද ඒ නිසාය. ඒ ඒ ප්‍රේමාන්තික සිත් විරහව අත්විඳින්නේ විවිධ වූ ආකාරයට වුවත්, එම පුද්ගලබද්ධ අත්දැකීම පොදු අත්දැකීමක් ලෙස ගීතය තුළින් සහෘදයාට සමීප කෙරෙයි. ප්‍රවීණ ගීත රචක කුලරත්න ආරියවංශයන් විසින් රචනා කරන ලද "තනි යහන මගේ" ගීතය සහෘද හදවත් තුළ ප්‍රේමයේ විරහව පිළිබඳ අනුවේදනීය හැඟීම් ජනිත කිරීමට සමත් ය. ප්‍රේමයේ විරහව පිළිබඳ ස්ත්‍රියකගේ සන්තානගත හැඟීම් කෙබඳු ද යන්න එම ගීතය තුළින් අපූරුවට විග්‍රහ කෙරෙයි.  " තනි යහන මගේ සිතට ඔබේ නොපෙනේ ද ප්‍රියේ මේ රාත්‍රියේ සෝ ගිනි ඇවිලේ විරහී හදෙ හී  ඔබට පිදූ පෙමිනී "  ප්‍රේමයෙන් පරාජය වූ අයෙකුට, නො එසේ නම් තම ප්‍රේමණීය අත්දැකීම් අහිමි වී ගිය අයෙකුට දැනෙන විරහවේ වේදනාව ඔවුන් විඳ දරා ගනුයේ විවිධ වූ ආකාරයට ය.කෙනෙක් මත්පැන් තුළින් සැනසුමක් සොයති.තවත් අයෙකු හඬා වැලපී සිය දුක නිවා ගැනීමට උත්සාහ දරයි.ඒ කෙසේ වෙතත් තනිකම නැමැති ඇබ්බැහිය කෙරෙහි යොමු වීමෙන් සිය සිත සනසා ගැනීමට දරන තැත සෑම අයෙකුට ම පොදු වූවකි.විරහව අත්විඳින ස්ත්‍රී පුරුෂ කවරෙකු වුව ද තනිකමට පෙම් බඳී. ඒ තුළින් තම සිතට සැනසීමක් ඔවුන් අපේක්ෂා කරයි. අතීත මතක සැමරුම් තුළ තනිව සුළු මොහොතකට හෝ එම ප්‍රේමණීය ආස්වාදයන් විඳගැනීමට ඔවුන් උත්සාහ කරයි. ප්‍රේමණීය ස්මරණයන් වඩාත් හදවතට සමීප වන රාත්‍රී හෝරාවේ එකී ස්මරණයන් සමග තනි කමට පෙම් බඳින හදවත් මේ මිහිපිට ඕනෑ තරම් දක්නට ඇත. මේ ගීතය ගැයෙනුයේ ශෂිකා නිසංසලා  මහත්මියගේ හඬිනි. ගීතය තුළ ඇගේ ගායනය සැබැවින් ම ශෝකී ස්වරයක් උසුලයි.එකී හඬ හදවත් සංස්පර්ශනය කරන සුළු ය. රෝහණ වීරසිංහයන් විසින් සංගීතවත් කරන ලද නාද රටා තුළින් ද ඇගේ හැඟීම් ශ්‍රාවකයාට සමීප කිරීමට මහඟු පිටුවහලක් වී ඇත. ගීතය තුළින් ප්‍රධාන කොටම ප්‍රේමණීය යුවලකගේ වියෝව මතින් ස්ත්‍රියට ඇතිවන්නා වූ හැඟීම් සමුදාය ඉදිරිපත් කෙරෙයි.මොවුන් විවාහක යුවලක් හෝ පෙම්වතුන් යුවලක් විය හැකිය.එකිනෙකා කෙරෙහි අසීමිත ස්නේහයකින් යුතුව කල් ගෙවූ බව ගීතය තුළින් පසක් වේ. කෙසේ වෙතත් යම් කරුණක් හේතුවෙන් ඔවුන්ට සිය ප්‍රේමය අහිමි ව ගොස් ඇත.මෙහි "තනි යහන" යන්නෙන් අදහස් කරනුයේ ඇගේ තනි වූ සිතයි. නො එසේ නම් තනිවු හදවතයි. " තනි යහන,විරහී හද,සෝ ගිනි " යනා දී යෙදුම් තුළින් මේ මොහොතේ ඇය අත්විඳින සන්තානයන් පිළිබඳව හෙළිදරව් කරයි.  " ප්‍රේමය නම් රසඳුනෙන් දොවා මෝහන මන් මද හැඟුම් මවා ආලයේ අමා මිහිරේ ඔබ ළමැදේ සුව යහන සදා  ඔබ ළමැදේ සුව යහන සදා "  මෙම ගී පද තුළින් ප්‍රධානකොට ම සිය අහිමි ප්‍රේමයේ මිහිරි මතකාවර්ජනයකට ඇයව රැගෙන යයි.ඇය අත්විඳි එකී ප්‍රේමය ඇය රසදුනක් පරිද්දෙනි දකී. එකී රසඳුනෙන් දොවාලූ මෝහනීය හැඟුම්වලින් බැඳී ඔහු හා ඇය විඳි ආලයේ සොඳුරුතම තැන් ඈ අභිමුව සිත්තම් වෙයි. සැබවින් ම එකී සෙනෙහස ඇගේ හද සුවපත් කරවන සුළු ය.එම මතකයන්ට පවා ඇය පෙම් බඳින්නේ ඒ නිසා විය යුතුය. දෙදෙනකු අතර ඇති කරගත් වඩාත් සමීප බැඳීමක් අත්හැර දැමීම එතරම් පහසු කටයුත්තක් නොවේ. විශේෂයෙන් ම ප්‍රේමාන්තික බැඳීමක් ගතින් අත්හළ ද, සිතින් අත්හැර දැමීම වඩාත් අසීරු ය. විරහවේ වේදනාව අත්විඳි අයෙකුට එය වඩාත් හොඳින් පැහැදිලි වනු ඇත. මෙහි සිටින කාන්තාව වුව ද අත්හැර දැමිය නොහැකි වූ එකී බැඳීම මතකාවර්ජන තුළින් වුව ද තවමත් සිතින් අල්වා හිඳින්නේ එකී  කාරණය මැනවින් සපථ කරමිනි.  " සෝක සුසුම් මතකයෙන් ගලා පාළු යහන් ගැබ ගිලන් වෙලා වේදනා නිවා මහදේ යළි ඔබගේ රුව දකින තුරා යළි ඔබගේ රුව දකින තුරා " ප්‍රේමය විරහවක් වූ තැන ප්‍රේමණීය මතකයන්ට සමු දීම එතරම් ලේසි පහසු කාර්යයක් නොවේ.සියලු බැඳීම් අවසන් වූ තැන වුවද නැවත නැවතත් තම අතීත මතකයන්ට පණ දීමට උත්සාහ කරනුයේ ඒ නිසාවෙනි.අතීතය වළලා අනාගතය තුළ ජීවත් වීමට දරන තැත බොහෝවිට සඵල වනුයේ නොදැනීම වුව හිත් කොණක සිය ප්‍රේමය යළි හිමි වේ යැයි යන බලාපොරොත්තුවක් රඳවා තබමිනි.මෙම තරුණිය සැබැවින් ම පසුවනුයේ සිත් පීඩාවෙනි.එම සිත් පීඩාව හේතුකොට ගෙන අතීත මතක ආවර්ජනයන් තුළින් ශෝකී වූ සුසුම් ඈ මුවින් ගලා යයි.සැබැවින් ම ඇගේ සිත ඔහු නොමැති සොවින් ගිලන් ව ඇත.ඔහුගේ රුවින් සහ ප්‍රේමණීය වදනකින් මුත් නොසිඳෙන වේදනාවකින් ඇය පීඩා විදියි.එබැවින් ඇගේ සිත සුවපත් කිරීම උදෙසා නැවතත් සිය ප්‍රේමය ඈ අභිමුවට පැමිණෙතැයි යන බලාපොරොත්තුවම ඇයව ජීවත් කරවයි.  ප්‍රේමයේ විරහව ස්ත්‍රී පුරුෂ කවර හදවතකට වුවද ඒකාකාර වූ සංවේගයකින් සමීප වෙයි.නමුත් ඔවුන් එකී සිත් පීඩාව විඳ දරාගනු ලබන ආකාරය විවිධ ය.ශශිකා නිසංසලා මහත්මියගේ ලයාන්විත ගායනය සැබැවින් ම රසික හදවත්වලට ආමන්ත්‍රණය කිරීමට සමත් බව නොරහසකි.එබැවින් ගීතයේ වචනාර්ථය තුළ පවත්නා හැගීම් ඇගේ ස්වරය තුළ ගැබ් කොට සහෘදයා වෙත සමීප කිරීමට ඇය සැබැවින් ම සමත් වී ඇත.මෙම ගීතය ගායනා වනුයේ යමුනී බිලාවල් රාගයට අනුව ය.රෝහණ වීරසිංහයන්ගේ සප්ත ස්වර නාද රටා සැබැවින් ම ගායනය හා මුසුව ගීතය තුළින් ශ්‍රාවක හදවත් වැළඳ ගැනීමට සමත් වී ඇත.කුලරත්න ආරියවංශයන්ගේ පද රචනයන් ශ්‍රාවක හදවත් වඩාත් සංවේගයෙන් වැළඳ ගැනීමට සමත්ව ඇති බව ද විශේෂයෙන් ම කිව යුතු ය.ඒ අනුව ප්‍රේමයේ විරහව පිළිබඳව ස්ත්‍රියකගේ හැඟීම් කෙලෙසක පවතීදැයි යන්න මනාව පසක් කරවන අපූර්ව ගීත නිර්මාණයක් ලෙස මෙම ගීතය හඳුන්වා දිය හැකි ය.