Blog

ඉන්දියානු දේව විශ්වාසයන් තුළ එන ප්‍රධාන දේව චරිතයක් වන පත්තිනි මෑණියන් හෙවත් කන්නගී අම්මන් මෙරට භක්ති සම්පන්න ජනතාව අතර ද තබා ඇත්තේ අධික විශ්වාසයකි. මෙම පත්තිනි මෑණියන් දේවත්වයට පත්වීමට පෙර කන්නගී නම් කුල දියණියක වූවා ය. මෙකී කන්නගී-කෝවලන් ප්‍රේම කතාව තුළ සතුරු චරිතයට නිතරඟයෙන් පත් වනුයේ මාධවී නම් ච‍රිතය යි. බොහෝ අවස්ථාවන් වලදී තම පහත් ආශාවන් සංසිඳුවා ගැනීම උදෙසා කෝවලන් හා සබඳතාවයක පැටළුණු වෛශ්‍යාවක බවට ඉතිහාසය තුළ හංවඩු ගසා ඇති මාධවී චරිතය නොහොත් මාධවී නම් වූ ගැහැණු සිත පිළිබඳව මානුශීය දර්ශනයක් ඉදිරිපත් වීම ඉතාමත්ම දුලබ ය. කන්නගීගේ ප්‍රිය විප්පයෝගය පිළිබඳව කම්පා වන්නා වූ ජනයා මාධවී ලද්දා වූ විප්පයෝගය පිළිබඳ නොතකන්නේ මනුෂ්‍ය  සිතෙහි ඇතිවන්නා වූ හැඟීම විවාහ අයිතියට කොටුකර ඇති බැවින් බව වටහා ගත හැකිය.    තමා හා ප්‍රේමයෙන් වෙළුණු කෝවලන්ගෙන් ලද ලෙයට ජීවය දුන් නාටිකාංගනාවක වූ කන්නගීගේ චිත්ත සන්තානයේ පිවිතුරු ප්‍රේමයක් නොතිබුණා යැයි අපට කිව නැහැකි අතරම විවාහ උරුමය මත ප්‍රේමයට සීමා පැනවීම ද කළ නොහැකි ය. මන්ද යමෙකුගේ සිතක් තුළ ප්‍රේම බීජයක් පැළ වීම අහේතුකව සිදුවන්නක් බැවිනි. එබැවින් වර්තමානය තුළද සල්ලාලයකු ලෙස කෝවලන් හඳුන්වාදීම කෙතරම් සාධාරණ ද යන්න ගැටලුවකි.    තමන්ගෙන් වෙන්ව යන තම ප්‍රේමය දෙස උපේක්ෂාවෙන් බලා සිටි මාධවියගේ ප්‍රේමය, තමාට සිදු වූ අසාධාරණකම් උදෙසා සාධාරණයක් ඉල්ලා පඬිපුරයක් ගිනි නොතැබුව මාධවීගේ ප්‍රේමය, මිනිසුන් වන්දනයට ලක් නොකළ නිහඬ ප්‍රේමයක හිමිකාරිණියගේ ප්‍රේමය හා කිසිදා පෙරලා කිසිවක් බලාපොරොත්තු නොවූ ත්‍යාගවන්තියගේ ප්‍රේමය හෙවත් මාධවිය හා කෝවලන් තුළ පැවති ප්‍රේමය ද ප්‍රේමණීය කතිකාවතකට ලක්විය යුතු අපූර්ව ප්‍රේමයක් බව වටහා ගත යුතු අතරම බුදුබව ලබනට පාරමී පුරන පත්තිනි දෙවියන්ට පහන් ටැඹක් වූයේ ද මේ මාධවී-කෝවලන් ප්‍රේමයම බව මතක් කළ යුතුම ය.