Blog

මනුස්ස ජීවිත කතා ඇතුළේ ආදරේ කොයිතරම් නම් ලොකු ඉඩක් අරගන්නවා ද;ජීවිත ඇතුළේ කොයිතරම් නම් හිස්තැන් මවනවා ද;එක තත්පරේකින් අපිට අපිව නැතිවෙන තැන් වගේම එක නිමේෂයකින් අපිට අපිව හමුවෙන තැන් ජීවිතේ කොයිතරම් නම් අනපේක්ෂිත ද?  මේක පටන් ගන්නේ කැම්ප්ස් එකක පළමු වසරට එන සිසුන් කණ්ඩායමකින්.ආදරය, මිත්‍රත්වය, සමාජ තත්වය, ලැබීම් නොලැබීම්,ගැටීම්,හීන එක්ක ගලාගෙන යද්දි හදවතේ පතුළට ම දැනෙන තරම් සමීප නිසාම Hridayam ලෙසින් නම් කෙරුණ මේ චිත්‍රපටය විනීත් ශ්‍රීනිවාසන්ගේ අධ්‍යක්ෂණයෙන් හැඩවුණ නැඟී එන මලයාලම් සිනමාවේ තවත් එක් හෘදයාංගම පරිච්ජේදයක් කිව්වොත් වැරදි නෑ. ඇත්තටම ගැඹුරු හැඟීමකින් ආදරය කරන එක, ඒ ආදරේ පරිස්සම් කරන එක වගේම දරාගන්න එක මතුපිටින් පේන  තරම් සරල නෑ. ඒ නිසාම ඒ වගේ හැඟීම් ඇතුළේ අතරමං වුනාම අපිට අපිව මඟඇරෙන එක අතඇරෙන එක වුනත් අපිටත් නොදැනීම වෙන්න පුලුවන්.  දර්ශනා,හදවතේ ගැඹුරුම තැනකින් ආදරේ දරාගෙන ආදරේ කරපු කෙල්ලෙක්.ඒ නිසාම වෙන්නැති සමහර අමාරුම තත්පරවලදි සාධාරණ හේතු තිබුණා වුණත් එයාට එයාලව මගඇරුනෙ. "එදා ෆස්ට් ඉයර් එකේදී මම ඔයාට සමාව දුන්න නම්..."  ඒ වචන ඇතුළේ දෝංකාර දුන්නෙම ඒ ආදරණීය, වරදකාරී හැඟීමේ රිදවුම්. අවසාන දවසෙ දුම්රිපළේ දි වගේම එදා ප්‍රථම හමුව  වුණ වෙරළෙ අයිනෙදි කසාදෙ දවසෙ පාන්දරත් ඒ හැඟීම ඒ රිදීම ඒ විදියටම ඒ තරමටම අරුන්ගෙ ඇස් ඉස්සරහ ලියවුණේ බැඳුන ආදරේ ඒ තරමටම හදවතට දැනුන නිසා වෙන්නැති. එතකොට අරුන්, පිස්සුවෙන් වගේ දර්ශනාට ආදරේ කරපු, එක තත්පරේක වැරැද්දකින් ලස්සන ම ප්‍රේමයකට නැවතුමක් දීලා ජීවිතේ හොදම කාලේ අරමුණක් හීනයක් තේරුමක් නැතුව ඔහේ පාවුන කොල්ලෙක්.අමතක කරන්න බැරි මතක, දරාගන්න බැරි හැඟුම් වගේම දර්ශනාවම ඉල්ලන හිතත් එක්ක අරුන් මායට ලංවුනේ දර්ශනාට රිද්දන්න. දර්ශනා නිසා මැවුන හිස්තැන ටිකක් හරි පුරවන්න.මායා අරුන් ලංවුන කතාවේ කිසිම තැනක ආදරයක් අපිට නොදැනෙන්නේ ඒ නිසාම වෙන්නැති.  අයාලේ පාවෙද්දි, හැමදේම එපාවෙද්දි ඉගෙනීමෙන් ඈතටම ගිය අරුන් ආයෙමත් හරි පාරට ගන්න වගේම බිඳිච්ච හිත් එක්ක වුනත් අරුන් දර්ශනා ලං වෙන්නත් හේතුවක් වුනේ සෙල්වා. ප්‍රේමයෙන් එහාට ජීවිතේ සමහර බැදීම් කොයිතරම් සොදුරුද ශක්තිමත්ද කියල මේ යාලුකම් ඇතුලෙන් අපිට කියල දෙනවා. "අම්මා තාත්‍තා සැනසීමෙන් නිදාගන්න ඕනේ.ඊට වඩා මොනවද බං" සෙල්වට තිබුණ එකම හීනෙත් සෙල්ව එක්කම බිඳිල යන්නෙ නොහිතන නිමේෂෙක මකන්න බැරි හිස්තැනක් එක්කමයි. Hridayam අවසානෙදි හිත රිද්දන ශෝකාන්තයක් වෙන්න නොදී ආයෙමත් ආදරෙන් පුරවන දගකාරී, නිත්‍යා, හීනයක් අරමුණක් නැතුව පාවෙන හිතකට පොද වැස්සක් වෙලා වස්සානය එක්ක ආදරය විශ්වාසය තේරුම්ගැනීම වගේම ඉරිසියාවත් අඩු නැතුව අරන් ආව කෙල්ලෙක්. හිස්තැන් පැළුම් තියන ජීවිතවලට ආදරේ කොයිතරම් වටිනව ද කියන එක නිත්‍යා අපිට කියල දෙනවා.අරුන් නීලකණ්ඩට තේරුමක් ඇතුව හුස්ම ගන්න හේතුවක් වගේම නැතිවුන සෙල්වට ආයෙමත් වටිනාකමක් ගේන්නත් නිත්‍යට පුළුවන් වෙනව. ලංවෙන, දුර යන, අතරමග නවතින හිත් එක්ක සංසරණය වන තාත්වික මානුෂීය හැඟීම් එක්ක මිත්‍රත්වය,ආදරේ,විරහව පිරුණු මේ ප්‍රේමණීය මලයාලම් චිත්‍රපටිය බැලුවට පස්සෙ සමහර විට ඔයාටත් දැනෙයි අරුන්ට වගේ හදවත ඇතුළෙන් සියුම් තන්තුවකින් රිදුමක් එක්ක කවුරුහරි ඔයාව අදිනවා වගේ හැඟීමක්........