Blog

රෑ මැදියම මත් වූ තොටියෝ...   විශාරද ඉන්දිකා උපමාලි මහත්මියගේ ලයාන්විත හඬින් ගීතවත් වන, අරුණ ගුණවර්ධනයන්ගේ සංගීතයෙන් හැඩවන මේ අපූරු පැදිපෙල රජී වෙල්ගමයන්ගේ. මෑත කාලයේ බිහි වූ ඉතා විශිෂ්ට ගීතයක් ලෙස මෙම ගීතය හඳුන්වන්න පුළුවන්. විශේෂයෙන්ම පදවැලේ අර්ථයට මුසු වූ ළයාන්විත සංගීතයත්, ස්වර නලවන අනුරාගී ගායනයත් එකී විශිෂ්ටත්වයට නොඅඩුව දායක වී තිබෙනවා.   රෑ මැදියම මත් වූ තොටියෝ...වචනාර්ථයෙන් මෙය තොටියෙකු පිළිබඳ කතාන්දරයක් යැයි කෙනෙකුට සිතෙන්නට පුළුවන්. නමුත් මෙහි වචන තුළ සැඟවුණු අර්ථය නම් එතරම් ලේසියෙන් පහසුවෙන් වරක් අසා අතහැර දැමිය නොහැකි තරමටම අරුත්බරයි; හැඟුම්බරයි..   කවුද ඇය කියන මේ තොටියා... ඒ තමයි ඇය හා එක් වී ප්‍රේමයේ අනුරාගය විඳින ඇගේ ස්වාමිපුරුෂයා. එහෙනම් ඇය කියන මේ මත් බව පිළිබඳ කාරණාව ඉතා සරලයි. ඇය පවසන්නෙ ඔවුන් විඳි ඔවුන්ගේ සංවාසය පිළිබඳ කතාව.   ඇය ඇගේ සැමියට කියනවා රෑ මැදියම මත් වෙලා ඔරු පදින්න ඇය කැඳවන තොටියා කියලා. පැහැදිලියි; ඔහු ඇයට ප්‍රේමණීය අනුරාගික ආරාධනාවක් කරනවා. ඒත් ඇය කියන්නෙ නුඹ විතරක් එතෙරට යන රෑ මැදියම මත් වූ තොටියෝ කියලා. ඇය යම් ආකාරයක චෝදනාවක් කරනවා ඔහුට. මා එතෙර නොකර ඔබ විතරක් එතෙර වෙනවා කියන චෝදනාව හරි අපූරුවට ඒ වචන ඇතුළෙ ගැබ්වෙලා තිබෙන බවයි මට හැඟෙන්නෙ.   ඇය ඇගේ චෝදනාව ගේන්නෙ පරණ මතකයක් එක්ක ගැටගහලා. ඇය ඔහුගෙන් අහනවා, 'මාස් වැස්ස ඉවර වෙලා අලුත් වතුර ගලන ගඟේ මල් නෙලුවා මතකද තොටියෝ' කියලා. මාස් වැස්ස ලෙස ඇය කියන්නෙ කාන්තාවන්ගේ මාසික ඔසප්වීම පිළිබඳව. ඇය අහනවා 'අලුත් වතුර ගලන ගඟේ මල් නෙළුවා මතකද' කියලා. ඔසප් වීමෙන් පස්සෙ එන්නෙ කාන්තාවකගේ සරු කාලය. ඇය අහනවා ඔහුගෙන් 'අපි ඒ නැවුම් බව වින්දා ඔබට මතකයිද' කියලා.   ඇය නැවත කියනවා ඔරුව පෙරලුණත් ගඟ මැද මාව අරන් ඔබෙ තුරුලට එතෙර කළා මතකයි තොටියෝ කියලා. ඒ කියන්නෙ ඔහු ඔහුගේ උපරිම ලිංගික තෘප්තිය ලැබුවට පසුවත් ඇය අත්නොහැර තුරුලට අරන් ඇයත් එයින් එතෙර කළ බව. ඇය කියනවා ඇයට මතකයි කියලා නමුත් ඇය ඔහුගෙන් අහන්නෙ ඔහුට මතකද කියලා. 'එවැනි ප්‍රේමණීය කාලයක් අපි ගත කළා ඔබට මතකද?' වැනි ප්‍රශ්නයක් තමයි ඇය ඔහුගෙන් අහන්නෙ. ලැබී නොලැබී ගිය හැඟීමක් විඳීමක් වෙනුවෙන් ඇය ඔහුගෙන් ප්‍රශ්න කරනවා කියලයි මට හැඟෙන්නෙ.   රුවල් නගා යන නැව් දැක සසල වෙලා බැලුවත් නුඹ නැව් නගින්න හිත නෑ තොටියො... රුවල් නගා යන නැව් ලෙස ඇය කියන්නෙ හැඩිදැඩි ප්‍රතාපවත් පුරුෂයින්ගෙන් ඇයට ලැබෙන ප්‍රේමණීය ආරාධනාවන් පිළිබඳව. ඒ වගේම එවැනි අවස්ථාවල ඔහු සසල වන බවකුත් පෙනෙන්නට තිබෙනවා. ඇය කියනවා ඔබ ඔහොම සසල වෙලා බැලුවට මට නැව් නගින්න හිතක් නෑ, අවශ්‍ය නෑ මට වෙන පුරුෂයෙකුගේ ප්‍රේමයක් හෝ රාගයක්. මං ආසයි ආයෙත් දවසක කුමුදු පිපුණ හඳ එළියක ඔයා එක්ක ඔයාගෙ ඔරුවෙන්ම මේ ගඟෙන් එතෙර වෙන්න. ඇය බලා ඉන්නවා නැවතත් පෙර ලෙසම ඔහුගෙන් ඒ ආදරණීය බව අනුරාගී බව නැවුම් ආකාරයෙන් විඳගන්න.   සමස්තයක් විදියට බලද්දි පවුල් ජීවිත අතරෙ කවදාවත් එළියට නොඑන හිත ඇතුළෙම රිදවන විඳවන ප්‍රශ්නයක් පීඩාවක් විදියට මේ කාරණය ගන්න පුළුවන්. එහෙත් මේ ගීතයේ එන කාන්තාව ඉතාමත් විශිෂ්ට ප්‍රේමණීය වගකීම්සහගත බිරිඳක්. ඇය තම සැමියාගෙන් වන අඩුපාඩුකම් වෙනත් පිරිමියෙකුගේ සෙවනේ විඳින්න බලාපොරොත්තු වෙන්නෙ නෑ. කවදා හෝ දවසක ඇය තම සැමියාගෙන් ම නැවතත් ඒ හැඟීමට පණ දෙන්න බලන් ඉන්නවා.  එවැනි දිනයක් ආවත් නොආවත් හැමදාම ඇය බලන් ඉඳීවි.   **** රෑ මැදියම මත් වූ තොටියෝ ඔරු පදින්න මා කැඳවන  ඔබ විතරක් එතෙරට යන රෑ මැදියම මත් වූ තොටියෝ   මාස් වැස්ස ඉවර වෙලා අළුත් වතුර ගලන ගඟේ මල් නෙළුවා මතකද තොටියෝ ඔරුව පෙරලුණත් ගඟ මැද මාව අරන් නුඹෙ තුරුලට එතෙර කළා මතකයි තොටියෝ   රුවල් නගා යන නැව් දැක සසල වෙලා බැලුවත් නුඹ නැව් නගින්න හිත නෑ තොටියෝ නුඹෙ ඔරුවෙන් යළි දවසක කුමුදු පිපුණ හඳ එළියක එතෙර යන්න ආසයි තොටියෝ