Blog

 "ආරාධනා" චිත්‍රපටයේ එන ප්‍රේමාන්විත ගීතයක් වන මෙම ගීතය යොවුන් තරුණියකගේ සහ තරුණයෙකුගේ නිකැළැල් ආදර අන්දරයක මිහිරියාව ගෙනහැර දක්වයි. මන බඳින යුග ගායනයකින්  හැඩ වැටුණු මෙම ගීතයෙහි ප්‍රේමවන්තයන් දෙදෙනාගේ සිතැඟි හුවා දක්වා ඇති අයුරු කදිම ය. මෙහිදී රචකයා යොදා ගෙන ඇති සරල බස් වහර මෙන්ම ශ්‍රාවකයාගේ සිතේ චිත්ත රූප මැවීමට සමත් උපමාලංකාර මගින් ගීතයේ රසය වඩ වඩාත් තීව්‍ර වී ඇත.   "සීත අරණේ සුපුල් නාමල සුවඳ ගැල්වු ජීවිතේ..." ගීතයේ මෙම පළමු පැදි පෙළින් මෑතකදී පෙම් ලොවට පිවිසි ප්‍රේමවන්තයන් එක්ව ගත කරන්නා වූ ජීවිතයේ සුන්දරත්වය මොනවට විදහා පායි. ඔවුන්ගේ තුරුණු සිත් වලට මෙම කුළුඳුල් ආලය නවුමු අත්දැකීමකි. මෙම ආගන්තුක හැඟීමෙන් තම ජීවිත වඩ වඩාත් සුවඳවත් වූ බවක් ඔවුනට හැඟේ. සිසිල් වනයක සුපිපුණු නාමලක් එම වනය සුවඳවත් සහ වර්ණවත් කරන්නේ යම් සේ ද එලෙසම ඔවුන්ගේ ජීවිත ද මෙම කෝඩුකාර වෙනසට බඳුන් ව නව ජීවයක් ලැබුවාක් වැන්න. රචකයා විසින් මෙම ආදරණීය පෙම් යුවළගේ ජීවිතවල ඇති වූ මිහිර, පිරිපුන් බව දක්වා ඇති ආකාරය ඉතාම ප්‍රශංසනීය ය.   "සීත හිමගිර සීත නොදැනේ දැනේ උණුසුම ආදරේ..."  මෙහිදී ඔවුන් එකිනෙකාට දක්වන ආදරය ඔවුන්ට කෙතරම් සුවිශේෂී එකක් ද යන වග ඉතා සියුම් ව දක්වා ඇත. මෙහිදී තරුණිය පවසන්නේ තමා අධික ශීතල කඳු මුදුනක සිටියද තම පෙම්බරයාණන්ගේ ආදරයේ උණුසුම හමුවේ තමාට එම ශීතල පවා නොදැනෙන බවයි. ඉන් ගම්‍ය වන්නේ තමාට කෙතරම් කටුක, අමිහිරි අත්දැකීම් වලට මුහුණ දීමට සිදු වුව ද තම පෙම්බරයාණන් තමා සමඟ සිටී නම් තමාට එහි කටුක බව තවදුරටත් නොදැනෙනු ඇති බවයි. තම ප්‍රේමවන්තයාගේ ආලයෙන් ඇය මුසපත් වී ඇති සෙයකි. ජීවිතයේ දුක් දොම්නස් වලට සාර්ථකව මුහුණ දීමට දැන් ඇයට දිරිය ඇත. යොවුන්, කුළුඳුල් ආදරයක ඇති ප්‍රබලත්වය පෙන්වීමට රචකයා ගෙන ඇති මෙම උත්සාහය සාර්ථක යැයි මට හැඟේ.   "ලතාවක් සේ වෙලී සියොළඟ පතමි රැකවරණය ඔබෙන්..." මෙම පැදි පෙළින් තුරුණු ආදරවන්තියකගේ අහිංසක ආයාචනයක් ගැන කියැවේ. තරුණියක් පතිනියක ලෙසින් නිවසින් බැහැර යන දිනය දක්වා ඇයට මව්පිය සෙනෙහස,  රැකවරණය නොඅඩුව ලැබෙන බැව් නොරහසකි. විවාහයෙන් පසු ඇය එම රැකවරණය තම ස්වාමිපුරුෂයාගෙන් අයැද සිටී. ලතාවක් වෘක්ෂයක් දැඩිව ග්‍රහණය කරගන්නාක් මෙන් ඇයට ඔහු හා සැමදා එක්ව විසීමට අවැසි බැව් ඈ පවසයි. එසේම, දැවැන්ත වෘක්ෂයෝ වටා ලතාවන් වෙළුණු කල, තනි තනිව පැවතීමට වඩා එය දැකුම්කළු දසුනකැයි මා කිවහොත් ඔබ මා හා එකඟ වනු නොඅනුමානයි.   "සදා දෝතින් මලක් සේ ඔබ වැළඳ ගන්නෙමි හදවතින්.." තම ප්‍රේමවන්තියගේ ආයාචනයට ප්‍රේමවන්තයා පිළිවදන් දී ඇති ආකාරය ඉතා මනරම් ය. හෙතෙම පවසන්නේ තම දෑතේ රුවාගත් පුෂ්පයක් සේ ඇයව රකිනා බවෙකි. පුෂ්පයෝ ඉතාම සියුමැලි ය. තැලී පොඩිවී නොයන්නට නම් ඉතා පරිස්සම් කළ යුතුය.  එපරිද්දෙන් මියෙන තුරාවට ඇයව ආදරයෙන් රැක බලා ගන්නා බැව් ඔහු පවසයි. එසේම ඔහු තම හදවතින් ම ඇයව වැළඳ ගන්නා බවද කියැවේ. තම හද මඩලේ අන් කිසිදු ළඳකට ඉඩක් නොමැති බව ඉන් ගම්‍ය වේ. ඔහුගේ ප්‍රේමයේ ස්ථිර බව හා පිවිතුරු බව මෙම පද පේළියෙන් ව්‍යංගාර්ථවත් කර ඇති ආකාරය ඉතාම අපූරු ය.   "වලාවක් සේ අයාලේ ගිය සිතට නිවහන ඔබ ළඟයි..." සිත යන්න කවරාකාරයේ දෙයක් දැයි මා මෙන්ම ඔබත් තවම හරි හැටි නොදන්නා බව මාගේ හැඟීමයි. සිත ක්ෂණයකින් දුර ඈත දිවයයි. මෙහිදී රචකයා සිත වලාකුළකට සමාන කර ඇත්තේ වලාවන් ද එපරිද්දෙන් දසත සැරිසරන බැවින් විය යුතුය. මෙහි එන තරුණියගේ සිත ද පෙරදා විවේකයක් ලද ඇසිල්ලේ ඉබාගාතේ ඉගිළ ගියද අද එය ඔහු ළඟ නතර වී ඇති සෙයකි. මිහිමත ඇයට සතුට, සැනසුම ලබා දෙන එකම සුරපුර ඇගේ පෙම්බරයාණන් සතුය. තවදුරටත් අන් කිසිවක් ගැන සිතීමටවත් ඇයට අස්වැසිල්ලක් නොමැත. ඇගේ සිත පුරා ම සැරිසරන්නේ ඔහුයි.  ඇගේ අයාලේ ගිය සිත හීලෑ කළේ ඔහුයි.   "මහා  කතරෙක ගෙවූ තනි මග නිමා කළ ඉම ඔබ නෙතයි..." මෙහිදී ආදරවන්තයා විසින් ඔහුගේත් ඇයගේත් ආදර දෑස් යා වුණ දා පටන් ඔවුන්  ගත කරන්නා වූ දිවියේ රසමුසු බව, යටි පෙළ අරුතක් ලෙසින් පවසා ඇත. එය කෙතරම් සුන්දර සහ ප්‍රේමණීය ද කිවහොත් මින් පෙර තමන් තනිව ගෙවූ කාලය දැන් ඔහුට දැනෙන්නේ ඉමක් කොනක් නොපෙනෙන මහා කාන්තාරයක් ලෙසිනි. එතරම් දුෂ්කර, පාළු බවක් එහි ගැබ් වී තිබූ බැව් ඔහුට ඒත්තු යන්නේ දැනුයි. ඇයගේ ආලයෙන් ඔහුගේ ගත සිත කුල්මත් වී ඇති බැව් මින් පැහැදිලි වේ. ඇගේ ආගමනය මරු කතරට බට දිය පොදක් හා සම ය. මෙහිදී රචකයා ශබ්ද රසය හා අර්ථ රසය එකට කැටි කොට රචනා කර ඇති අයුරු ඉතාම විශිෂ්ට ය.   මිල්ටන් මල්ලවආරච්චි ශූරීන්  සහ මාලනී බුලත්සිංහලයන්ගේ හඬ සුසංයෝගයෙන් ඔප දමනු ලැබූ, කුලරත්න ආරියවංශයන්ගේ මෙම ගීත සංකල්පනාව ඉතාම අරුත්බර පද රචනයක්‍ ය යන්න මාගේ හැඟීමයි. එසේම ගීතයට ඔබින මියුරු සංගීතයෙන් ආදරවන්තයන් යුවලගේ හැඟීම් දැනීම් ශ්‍රාවකයාගේ සිතට කා වැද්දීමට මෙම ගීතය සමත් ව ඇති බව විවාදයකින් තොරව පිළිගත හැකි කරුණෙකි.   සීත අරණේ සුපුල් නාමල සුවඳ ගැල්වු ජීවිතේ  සීත හිමගිර සීත නොදැනේ දැනේ උණුසුම ආදරේ...   ලතාවක් සේ වෙලී සියොළඟ  පතමි රැකවරණය ඔබෙන්...// සදා දෝතින් මලක් සේ ඔබ  වැළඳ ගන්නෙමි හදවතින්... හදවතින්    වලාවක් සේ අයාලේ ගිය සිතට නිවහන ඔබ ළඟයි...// මහා  කතරෙක ගෙවූ තනි මග  නිමා කළ ඉම ඔබ නෙතයි ඔබ නෙතයි....