Blog

අහිමි වීමට වටිනාකමක් ඇත... ජීවිතයේ ඔබට සමහර දේවල් සිතාගත නොහැකි විදිහට අහිමි වෙනවා. එහිදී ඔබට දුකක්, වෛරයක් වැනි සෘණාත්මක හැඟීම් ඇති වෙනවා. ඒක සාමාන්‍යයි. දෑත් දෙපා අහිමි, නොපෙනෙන ලෝකයක, නොඇසෙන ලෝකයක සාර්ථක ලෙස ජීවත් වන මිනිසුන් අප කොතෙකුත් දැක ඇත. ඔවුන් ඒ තත්ත්වයට පත් වන්නේ අහිමි වීම් නිසා ලැබෙන අත්දැකීම් තුළින් ය. ඔවුන්ට එය අහිමි වුවත්, ඔවුන් අරමුණු, බලාපොරොත්තු පසුපස හඹා යමින් සාමාන්‍ය මිනිසුන් ඉදිරියේ ජීවන අරගලයක යෙදී සිටී. ඒ අහිමි වීම් හමුවේ ඔවුන්ට අන්‍යන වූ නොයෙක් බාධක අභියෝග වලට මුහුණ දෙමින්,ජීවිතය සමඟ නිහඬ අරගලයක යෙදෙනවා. ජීවිතය ජයගන්නට අසීමිත කැපකිරීම් කරන්නට සිදුවෙනවා. අවසානයේ සාර්ථකත්වයේ හිනිපෙත්තට යමින් ඔවුන්ගේ ජීවිත, කතා පොත්වල ලියැවෙමින්, බොහෝ පුද්ගලයන් අතර බෙදාගනිමින්, පූර්වාදර්ශ ජීවිත බවට පත් වෙනවා. ඉතිං ඒ අහිමි වීම් හමුවේ, නිරත වෙන සෑම අරගලයක් පිටුපස ඉතිරි වන්නේ, ඔබේ ජීවිතයට යම් වටිනා ඇත්දැකීම් සමූහයක් නොවේද? කලයක් සමඟ පළුදු වන රත්‍රං වලට වඩා ඒ අහිමි වීමෙන් ලැබෙන අත්දැකීම් වටිනවා නේද? අහිමි වීම වෙනුවෙන් කරන නිවැරදි කැපකිරීම් තුළින් ලියැවී ඇති දෛවය පවා වෙනස් කළ හැකි නොවේද? අහිමි වීම ජීවිතයට ආශිර්වාදයක් කරගන්න පුළුවන් නම්, ඒ දෙස උපේක්ෂා සහගතව බැලිය හැකි නම්, ඔබ නොදකින ඔබට නොපෙනෙන දැවැන්ත ශක්තියක් ඔබ තුළම සැඟවිලා තියෙනවා. ඒ සැඟවුණ ශක්තිය සොයාගත යුත්තේද ඔබමයි. මතක තියාගන්න අහිමි වීමක් විටෙක, ඔබට සාර්ථකත්වය කරා පියමනින්නට ඇවැසි උත්ප්‍රේරකයක්‍ වන බව. මං හිතන්නේ ජීවිතය කියන්නෙම අත්දැකීම් එක්ක යා යුතු අපූරු විසල් ගමනක් ය.