Blog

ගංගා හර්ජීවන්දාස් කාඨියාවාඩී... ඉන්දියාවේ කාඨියාවාඩ් ප්‍රදේශයේ සැප සම්පත් වලින් ආඪ්‍ය වූ නිවසක උපන් කෙල්ලක්. ඇගේ පියා බැරිස්ටර්වරයෙක්. සමාජය හා මුහු නොවිච්ච අහිංසකාවියක් වුණු ඇයට අඳුනාගන්න බැරි වුණ තරමට කෛරාටිකකම්වලින් පිරුණු ඇගේ පෙම්වතා රම්නික්, සිනමා තාරකාවක් වෙන්න ඇගේ තිබුණු ආසාවෙන් ප්‍රයෝජන අරන් ඇයව '''කාමාඨිපුරා'' වෙත එක්කගෙන එනවා... ඒ නිකම්ම නෙවෙයි.. ඇයට පරම්පරාවෙන් උරුම වුණ රන් ආභරණ සහ මිල මුදල් සියල්ලමත්, අම්මාගේ අල්මාරියේ යතුරත් එක්කයි... ''රම්නික්, අම්මා මේ යතුරත් එක්කම දැන් මාවත් හොයනවා ඇති..." ඇය දුම්රිය ගමන අතරතුර දී පෙම්වතාට කියනවා. ඒ ඇගේ ජීවිතයේ පළමුවන දුම්රිය ගමනයි. ඇගේ ජීවිතයේ දෙවෙනි දුම්රිය ගමනත් පළමු දුම්රිය ගමන වගේම අතිශය තීරණාත්මක එකක්. ඇගේ ජීවිතයේ හැරවුම් ලක්ශයක් සනිටුහන් කරපු පළවෙනි ගමන වගේමයි. ඇය එන්නේ අග්‍රාමාත්‍යතුමන් හමුවෙන බලාපොරොත්තුවෙන්.. ඒ හාරදහසක් වූ ''කාමාඨිපුරා'' කාන්තාවන්ගේ නියෝජිතවරිය ලෙසයි. ඔවුන්ව පාරට ඇද වැටෙන්න ඔන්න මෙන්න තිබිය දී ඇය අගමැතිතුමන් හමුවෙන්න එන ගමන, කාමාඨිපුරාවල සැමියන් නොමැති පවුල් වෙනුවෙන් කතා කරල දිනන්න ඇයට ලැබෙන්නෙ විනාඩි පහළවයි...  ඒ විනාඩි පහළවේ දී ඇය ඔවුන් ගේ අනාගතය සුරක්ෂිත කරනවා පමණක් නොවෙයි. සාකච්ඡාවට කලින් ඇය අදිටන් කරගෙන තිබුණු විදියටම අගමැතිතුමාගේ බොත්තම් කාසයේ රඳවා තිබුණු රෝස මල දිනාගන්නත් සමත් වෙනවා..  ඇය ඉන්දියාවේ පුරඟන වෘත්තිය නීතිගත කරන්න උත්සාහ කරපු පළමු කාන්තාවයි. ඒ වගේම පුරඟනන්ගේ දරුවන්ට ඉගෙනීමේ අයිතිය ලබා දෙන්නත් ඔවුන් පුරඟන වෘත්තියෙන් මුදවා ගන්නත් කටයුතු කරපු කාන්තාවක්. "කාමාඨිපුරා", ඉන්දියාවේ පුරඟන වෘත්තියේ යෙදෙන්නන්ගේ නගරයක්. ඇගේ පෙම්වතා සිනමාපටයක රඟපෑමට අවස්ථාව දෙන බව කියමින් ඇයව රවටාගෙන අවුත් කාමාඨිපුරා හී ගණිකා මඬමකට විකුණන්නේ රුපියල් දහසකට. විශ්වාසය බිඳී ආදරය අහිමි වී දෙමව්පියන්ගේ රැකවරණය ද අහිමි වුණත් ඇය සටන් කරන්න තීරණය කරනවා.. ඒ තමන්ගෙත් කාමාඨිපුරාවල කාන්තාවන්ගේත් ආරක්ෂාව වෙනුවෙන්. අහිංසක දුර්වල තරුණියක් වුණු ගංගා තමන්ට එල්ල වුණු තාඩන පීඩන, අසාධාරණකම්, හදවත් බිඳීම් හමුවේ ෆීනික්ස් කිරිල්ලියක ලෙස තව තවත් ශක්තිමත්ව ''ගංගුබායි" ලෙස උපත ලබනවා. කාමාඨිපුරා නගරය ආසන්නයේ පාසලක පාලක මණ්ඩලය මේ නගරය වසා දමමින් හාරදහසක් වූ කාන්තාවන් පාරට ඇද දමන්නැයි ඉල්ලා නඩු මඟට බසිනවා. ඒ වගේම පාසලේ ඉගෙනුම ලබන පුරඟනන්ගේ දරුවන්ට තලා ඔවුන්ව පාසලෙන් පන්නා දමනවා. කොතැනක ගියත් මේ කාන්තාවන්ට ඔවුන්ගේ මූලික අයිතිවාසිකම් හිමිවෙන්නේ නැහැ. ඔවුන් අධික ලෙස තාඩන පීඩන වලට ලක් වනවා. ඔවුන් වෙනුවෙන් ඇය කාමාඨිපුරාවල පුරපතිනිය ලෙස පත් වීමට තීරණය කරනවා. ඒ ඇයට අවංකවම ආදරය කළ, කාමාඨිපුරාවේ ඇඳුම් මසන්නෙකුගේ පුත්‍රයකු වුණ අහිංසක තරුණයා, අෆ්ශාන්ගේ ආදරයද කැප කරමිනුයි.  "කාමාඨිපුරාවල කාන්තාවන්ගේ අනාගතය වෙනුවෙන් මට අෆ්ශාන්ලා එක්කෙනෙක් නෙවෙයි. දාහක් වුණත් කැප කරන්න පුළුවන්". ඒ ඇය ඔහුට කියන අවසන් වචනයයි. අන්තිමට ඇය දිනනවා. ඒ ඇගේ නගරයේ කාන්තාවන්ගේ මූලික අයිතිවාසිකම් තහවුරු කරමිනුයි.  හුසේන් සයිදී ගේ "Mafia Queens of Mumbai" කෘතිය ඇසුරෙන් තිරයට නැඟුණු මෙම චිත්‍රපටය සංජේ ලීලා භන්සාලි ගේ අධ්‍යක්ෂණයක්.  ''ගංගා'' ගෙවත් "ගංගුබායි" ලෙස මෙහි විශිෂ්ට රංගනයක යෙදෙන්නේ ආලියා භට්. ගංගා, එදා සටන් නොවැදී දුර්වලයෙක් ලෙසම ‍සැඟවී සිටින්නට තීරණය කළා නම්, ඇගේත් හාරදහසකට අධික කාන්තාවන් පිරිසකගේත් ජීවිතය මහ මඟින් කෙළවර වන්නට තිබුණා.  "දෛවය ජීවිතයේ සාරයම උරා බී නැවත නොනැඟිටිය හැකි තත්ත්වයකට ම පත් කර තිබුණත් නොනැවතී සටන් කරන්න." ඒ ගංගාගේ පාඩමයි.