Blog

අද කාලෙ ආදරේ කොයි වගේද ? විනාඩි දෙකේ නූඩ්ල්ස් වගේ. බඩට වැටුණු ගමන් ඉවරවෙනවා. ෆේස්බුක් එකෙන් පටන් අරන්, කාර් එකේ පස්සෙ ශීට් එකේ ගතකරල, උසාවියට ගිහින් ඉවරවෙනවා. මේ කියන්න යන්නෙ සත්‍ය, වෙනස්ම ආදර කතාවක්. දේදුනු සහ හීනවලින් පිරුණු ආදරයක්. එය ආත්මාර්ථකාමී ආදරයක් නෙවෙයි. අපිරිසිදු ආදරයක් නෙවෙයි. හද කිති කැවෙන ආදරයක්. මර්ෆි , එහෙමත් නැත්තම් බර්ෆි, සෘති සහ ජිල්මිල්ගේ තුන්කොන් ආදර කතාවට චිත්‍රපට නිෂ්පාදකයා පෙරවදන සපයන්නේ ඔන්න ඔය විදිහටයි. 2012 වසරේ හින්දි සිනමාවට එක්වුන "බර්ෆි" සිනමාපටයේ කතාව , තිරරචනය සහ අධ්‍යක්ෂණය අනුරාග් බාසුගෙන්. ප්‍රියංකා චොප්රා සමඟ රන්බීර් කපූර් සහ ඉලියානා ඩි කෲස් රංගනයෙන් දායකවන මෙම නිර්මාණයේ සංගීත අධ්‍යක්ෂණය සිදුකරන්නේ ප්‍රීතම් විසින්. ඉන්දීය සම්මාන උළෙල රැසක සම්මානවලින් පිදුම් ලැබූ බර්ෆි, 85 වෙනි ඇකඩමි සම්මාන උළෙලේ ඉන්දීය නියෝජනය ද වුණා. මේ කතාවේ කතා නායකයා මර්ෆි ජොන්සන් , ඉන්දියාවේ ඩාජිලිංවල වෙසෙන ගොළු බිහිරි තරුණයෙක්. නම අහන කාටත් ඔහුගේ ප්‍රතිචාරය ඇසෙන්නෙ "බර්ෆි" විදිහට. මෙතැන්සිට ඔහුව එලෙසින්ම ආමන්ත්‍රණය කරමු. බර්ෆි හරි දඟකාර තරුණයෙක්. ඔහුගේ කලබගෑනි නිසා නිතරම ඒ පලාතේ පොලිස් පරීක්ෂක සුදන්ශු දත්තාගේ ලුහුබැඳීමට පාත්‍රවුන තැනැත්තෙක්. ඩාජිලිංවලට සෘති ඝෝෂ්ගේ ආගමනය සිද්ධ වෙන්නෙ මේ අතරයි. සෘති රූමත් වගේම උගත් ගැහැනු දරුවෙක්. ජංගම දුරකථන හිඟ, ඩිජිටල් අවකාශයට බොහොම දුරින් ගෙවුනු හැත්තෑව දශකේ ආදරය ප්‍රකාශ වුන ප්‍රධාන මාධ්‍ය , හසුන්පත්. එහෙමත් නැත්තම් ලියුම්. මේ කතාවෙ මුලදිම සෘතිව දැක්ක ගමන් බර්ෆිට ඇය ගැන කැමැත්තක් ඇතිවෙන මොහොතෙ වචන නැතුව ඔහු හරි අපූරුවට තමන්ගෙ ආදරේ ප්‍රකාශ කරනවා.ඒ වෙලාවෙ තමන් දැනටමත් විවාහ ගිවිසගෙන ඉන්න බව ඇය ඔහුට කිව්වම ඔහුගේ ප්‍රතිචාරය ඊටත්වඩා ආදරණීයයි. ඔහු එතැනින් ගිහින් ඇයට ලියුමක් එවනවා ඔහුගේ මිතුරෙකු අතේ. බර්ෆි මේ වෙලාවෙ ඉන්නේ නගරෙ ඔර්ලෝසු කණුව මුදුනේ. සෘති ඇගේ මිතුරිය එක්ක ඉඳගෙන ඉන්න අවන්හල එතනට හොඳට පේනවා. "බලන්න, මම ඔර්ලෝසුවේ විනාඩි පහලොවක් ආපස්සට යැව්වා, ඔයයි මමයි කවදාවත් හමුවුනේ නෑ කියල කියන්න. මම ඔයාට කවදාවත් යෝජනාවක් කළේ නෑ කියලා කියන්න. ඔයාට බර්ෆි කියලා අලුත් යාළුවෙක් හිටියෙ නෑ කියල කියන්න. ඔයාගෙ විවාහයට බර්ෆි උදව් කරනවා කියලා කියන්න. මේ හැමදේකටම පස්සෙත්, ඇයි ඔයා හිනාවෙලා අත වනන්නෙ නැත්තෙ?" ඔන්න ඔහොමයි ලියුම ලියවිලා තිබුනේ. තමන්ගෙ ආදරේ මුල් වතාවෙම ප්‍රතිකේෂ්ප වුන තරුණයෙක්ගෙන් බලාපොරොත්තු වෙන්න අපහසු තරමේ විනීතකමක්, සුහදත්වයක් ඒක. බර්ෆිගෙ නිර්ව්‍යාජත්වයත්, අවංකබවත් මොනවට පෙන්වන අවස්ථාවක් ඒක. හරි ඉක්මනටම බර්ෆි -සෘති මිතුදම ආදරයකට පෙරලෙනවා. මේ ආදර කතාවට ආයුශ අඩුවෙන්නෙ, සෘතිට තමන්ගේ අම්මගෙන් හැම දුවෙකුටම ලැබෙන , තමන්ට නොගැලපෙන තැනැත්තෙක් සමඟ විවාහ නොවන්නැයි යන සුපුරුදු අවවාදය නිසයි. අම්මගෙ අවවාදය පිළිගෙන , තමන් විවාහ ගිවිසගෙන සිටි රංජිත් සෙන්ගුප්තා සමඟ විවාහ වන සෘති, බර්ෆි එක්ක ගනුදෙනු අහවර කරමින් ඩාජිලිංවලට සමුදෙන්න තීරණය කරනවා. මේ අතර වකුගඩු ආබාධයක් නිසා බර්ෆිගෙ තාත්තට සැත්කමක් කරන්න සිද්ධවෙනවා. සැත්කමේ පිරිවැය රුපියල් හත්දහසක්. බර්ෆිට මේ සිදුවීම් වෙන අතරෙ බර්ෆිගෙ ළමාකල මිතුරියක් වන, ධනවත් පවුලක තරුණියක් වන, තරමක මානසික දුබලතාවයකින් පෙලෙන ජිල්මිල් චැටර්ජිව පැහැරගැනීමට ලක්වෙනවා. මේ සම්බන්ධ විමර්ශනය බාරවෙන්නෙ පොලිස් පරීක්ෂක දත්තාට. තාත්තගෙ සැත්කමට වුවමනා මුදල වෙනුවෙන් බැංකුවක් මංකොල්ල කන්න දරන අසාර්ථක උත්සාහයට පස්සෙ එතැනින් පලායන බර්ෆිට අතහැරදමන ලද වෑන් රථයක් ඇතුලෙ ඉඳන් ජිල්මිල්ව හමුවෙනවා. ජිල්මිල්ව තමන්ගෙ නිවසේ හංගන බර්ෆි , ජිල්මිල්ගෙ තාත්තාට කප්පම් ලියුමක් ලියනවා , රුපියල් හත්දහසක කප්පමක් ඉල්ලමින්. කප්පම් මුදල ලබාගත්තත් , අවශ්‍ය වෙලාවට සැත්කම කරන්න බැරිවීමෙන් බර්ෆිගේ තාත්තා මේ ලෝකෙට ආයුබෝවන් කියනවා. බර්ෆි අධෛර්යමත් වෙනවා. ජිල්මිල්ව , ඇයව මින් පෙර බලාගත් බාරකාරියගෙ නිවසට ඇරලවලා හොර පාරෙන්ම ගෙදර යන්න හැදුවත් බර්ෆිට ඒකට ඉඩ නොලැබෙන්නේ, ජිල්මිල් බොහොම තදින් ඇයට බර්ෆි සමඟ සිටීමට අවශ්‍ය බව දක්වා සිටින නිසයි. ඩාජිලිංවලින් කල්කටාවට බර්ෆිගෙත් ජිල්මිල්ගෙත් සංක්‍රමණය සිදුවෙන්නෙ ඊටපස්සෙයි. මේ සිද්ධි දාමය සිදුවෙන්නේ 1972 අවුරුද්දේ. හය අවුරුද්දකට පස්සේ ,1978 දී, කල්කටාවෙදි බර්ෆිට , සෘතිව හමුවෙනවා. නැවත ඔවුන්ගේ මිතුදම අළුත් කරගන්න මේ කාලවකවානුවෙදි ඔවුන් දෙන්නටම අවස්ථාව ලැබෙනවා. සෘතිට තමන්ගෙ ජීවිතේ හොඳම දවස් ආපහු ආපු බවක් හැඟෙන්නේ කල්කටාවෙදි නැවත බර්ෆිව මුණගැහුනට පස්සෙයි. සෘතිගේ ආගමනය ජිල්මිල්ට ඊර්ෂ්‍යාව ඇතිකරන්නක්. ඇය දැනටමත් බර්ෆිට ආදරය කරනවා, ඇය කරන්නෙ ආදරයක් බවවත් නොදැන. සෘති විදිහට සාරි අඳින්න , හැඩවෙන්න තනන තමන්ටම සිනහවෙන ජිල්මිල් ඇගේ සෑම හැසිරීමකින්ම පෙන්වන්නේ බර්ෆි කෙරෙහි ඇගේ ලෙන්ගතුබවයි. සෘති හා ජිල්මිල් එක්ක වීදි ආහාර රස බලන බර්ෆි , ආහාර ගැනීමේදී ඇගේ නොසැලකිලිමත්බාවය ගැන ජිල්මිල්ට සිය අමනාපය පළකරනවා. සිය ප්‍රියතමයාගේ අමනාප ප්‍රකාශය නොඉවසන ජිල්මිල් එතැනින් ඉවතට යනවා. මේ වෙලාවෙදි තමයි, සෘති සමඟ අල්ලාප සල්ලාපයෙහි යෙදෙමින් ආහාර ගනිද්දි , ජිල්මිල් එතැන නොමැති බව බර්ෆිට වැටහෙන්නෙ. ජිල්මිල් නොමැතිව තමන්ගේ ජීවිතයේ ඇති හිස්කම ඔහුට වැටහෙන්නේ ඇගේ මෙම දෙවන අතුරුදන් වීමෙන් පසුවයි. සෘති තමන් සමඟ සිටියත් , ඇයට ජිල්මිල්ගේ තැන ගත නොහැක බව සෘති මෙන්ම බර්ෆිද අවබෝධ කරගන්නේ මේ කාලයේයි. බර්ෆිගෙත් ජිල්මිල්ගෙත් ආදර කතාවෙ වචන හිඟයි. නැත්තටම නැති තරම් කිව්වොත් නිවැරදියි. ඔවුන් කිසි දවසක " මං ඔයාට ආදරෙයි" කියලා නැහැ. වචන අඩු ඔවුන්ගේ ආදරේ ඇතුලේ ඔවුන් ආදරෙයි කිව්වෙ "හැමදේකින්ම". බලන බැල්මක, තතනමින් පිටකරන වචනයක, සිනහවක ගැබ්වෙලා තිබුනේ ආදරය විතරමයි. ඒක ඇත්තටම පිරිසිදු ආදරයක්. ආදරය,ප්‍රේමය කියන්නෙ එක්තරා ආකාරයකට භාවනාවක්. මෛත්‍රී භාවනාවක්. ශරීර ස්පර්ශයකට එහාගිය, වාචික ප්‍රේම ප්‍රකාශයන්ට එහාගිය, සිය හෘදයාංගමයාගේ සුබසිද්ධියම පතන මෙත් වැඩීමක්. වෛරය ,ක්‍රෝධය වැනි අකුසල චෛතසිකයන්ට එහි ඉඩක් නැහැ. බර්ෆි-ජිල්මිල්- සෘති තුන්කොන් ප්‍රේම වෘත්තාන්තය එයට ජීවමාන නිදර්ශනයක්. ආදරය, සතුට, කුතුහලය, දුක, පැටළිලි සහගත බව එක්ක දෙහෝරාවකුත් තව අඩහෝරාවක් පුරාවට දිවෙන මේ කතාවේ අවසානය කෙබඳුද? පිරිසිදු ආදරය නැවත එක්වෙයිද?මේ ප්‍රශ්නවලට පිළිතුරු අවශ්‍ය කෙනෙක් අනිවාරෙන් නැරඹිය යුතුම සිනමාපටයක් , ”බර්ෆි"