Blog

මිනිසුන් සහ සත්ත්වයන් අතර ඇතිවන බැඳීම් පාදක කරගනිමින් නිර්මාණය වූ සලරූ ගණනාවක්ම අප දැක ඇත. ඒ අතුරින් වෙනස්ම ආකාරයේ කථා තේමාවක් රැගත් චිත්‍රපටයක් ලෙස මිනිත්තු 106ක ධාවන කාලයක් තුල තිරය පුරා දිගහැරෙන "Lamb” නම් අයිස්ලන්ත චිත්‍රපටය සඳහන් කළ හැකිය. අයිස්ලන්ත අධ්‍යක්ෂක වල්දිමාර් යොහැන්සන් ප්‍රථම වෘත්තාන්ත චිත්‍රපටය වන මෙම සංත්‍රාස-ප්‍රහසන චිත්‍රපටය තිර රචනය කරන ලද්දේ යොහැන්සන් සමඟ පද රචක ෂෝන් විසිනි. මෙහි ප්‍රධාන චරිතය නිරූපණය කරන නෝමි රපාස් මෙහි විධායක අධ්‍යක්ෂකවරිය ද වේ. මරියා (රපාස්) සහ ඉන්ග්වාර් (හිල්මිර් ස්නෑර් ගුත්නසන්) යනු අයිස්ලන්තයේ පිටිසර ගොවිපළක වෙසෙන විවාපත් යුවළකි. සිය එකම දරුවාගේ වියෝවෙන් පසු ඔවුන් ශෝකයෙන් පසුවන බව පෙනෙන්නට තිබේ. කථාව ආරම්භ වන්නේ යම් අද්භූත දෙයක් දැකීමෙන් මඩුවේ සිටින බැටළුවන් කලබලවීමත් සමඟයි. පසුව ඒ අතරින් එක් ගර්භිනී බැටළුදෙනක මිනිස්-බැටළු දෙමුහුම් පැටවකු බිහිකරන්නේ අද්භූත අයුරිනි. පැටවාට බැටළු හිසක් ද, මනුෂ්‍ය ශරීරයක් ද තිබේ. ඉන් විස්මයට පත්වන මරියා තුළ එම පැටවා කෙරෙහි බැඳීමක් ඇතිවන අතර, ඇය එම පැටවා සිය මියගිය දියණිය වූ "ආදා"ගේ නමින් නම්කරන්නී ය. මේ කුඩා ලොම්පිරි මිනිස්-බැටළු පැටවා කෙමෙන් හැදී වැඩෙන අතර, පැටවාව ළදරු ඇඳුම්වලින් සරසන යුවළ, සිය මියගිය දරුවාගේ වියෝව නිසා ඇතිවූ ශෝකය තුනී කරගන්නට මෙම පැටවා උපකාරී කරගනිති. මේ අතර, ඉන්ග්වාර්ගේ සහෝදරයා වන පේටර් (අසාර්ථක පොප් ගායකයෙකි) පැමිණීමත් සමඟ තත්ත්වය තරමක් වෙනස් අයුරක් ගනියි. නිවැසියන්ගේ අසාමාන්‍ය ක්‍රියාකලාපය හේතුවෙන් ඔහු විමතියට පත්වෙයි. ආදා හට පේටර් ප්‍රියනොකළ ද, ආදා ඔහු සමඟ කුළුපග වෙන්නට තැත්කරයි. පේටර් රයිෆලයක් රැගෙන ආදා වෙත එල්ල කරන නමුත්, ඔවුන් අතර ඇතිවන බැඳීම නිසා ඔහුට ඇයව මරාදමන්නට හිත හදාගන්නට නොහැකි වේ. නමුත් ගොවිපළේ බැටළුවන් මේ සම්බන්ධයෙන් යමක් දන්නා බව පෙනේ. ආදා පසුපස ඇති සැඟවුණු සත්‍යය දැනගන්නට ප්‍රේක්ෂකයාට සිනමාපටයෙහි අවසන් භාගය තෙක්ම රැඳී සිටින්නට සිදුවේ. කෙසේවෙතත් අධ්‍යක්ෂක ‍යොහැන්සන් අපගේ මෙම සංත්‍රාස චිත්‍රපටයට විකාරරූපී අවසානයක් ලබාදෙන්නට දරා ඇති උත්සාහය පැසසිය යුතුය. එහි දී භීතිය ඉක්මවමින්, මරියා කෙරෙහි ප්‍රේක්ෂකයා තුළ ඇතිවන්නේ අනුකම්පාවකි. මරියා ලෙස රපාස් මෙහි විශිෂ්ට රංගනයක නිරතවන්නී ය. 2021 කන් (Cannes) චිත්‍රපට උළෙලේ දී ප්‍රථම වරට තිරගත වූ මෙම චිත්‍රපටය 2021 සැප්තැම්බර් 24 දින අයිස්ලන්තයේ මුදාහැරිණි. මෙය 94වන ඇකඩමි සම්මාන උළෙලෙහි හොඳම අන්තර්ජාතික වෘත්තාන්ත චිත්‍රපටය යන ප්‍රවර්ගය යටතේ අයිස්ලන්තය නියෝජනය කිරීමට මෙම චිත්‍රපටය තෝරාගැනිණි.මෙම නිර්මාණය වෙනස් රසයක සිනමා අත්දැකීමක් ලබාගැනීම සඳහා ප්‍රිය සිනමාලෝලීන් සඳහාමයි.