Blog

Psychological thriller ශානරයට අයත් “Oldboy” සහ “The Handmaiden” චිත්‍රපට නිසා කීර්තියට පත් ප්‍රවීණ කොරියානු අධ්‍යක්ෂක පාක් චන්-වූක් විසින් නිර්මාණය කරන ලද නවතම සිනමා නිර්මාණය වන්නේ “Decision to Leave” චිත්‍රපටයයි. මිනිත්තු 138ක් වූ ධාවන කාලයක් සහිත මේ නිර්මාණය හරහා, අතිශයින්ම සංකීර්ණ වූ කථා පුවතක් නිර්මාණාත්මක ලෙසින් ප්‍රේක්ෂකයාට ගෙනහැර පෑමට , අධ්‍යක්ෂකවරයා දක්වන කුසලතාවය යළිත් ප්‍රත්‍යක්ෂ කර පෙන්වයි. මෙවර 2022 කන් (Cannes) සිනමා උළෙලේ පාම් ඩෝර් (Palm d’Or) ප්‍රවර්ගය සඳහා නිර්දිෂ්ට වූ මෙම කෘතිය පාක් චන්-වූක් හට හොඳම අධ්‍යක්ෂක සඳහා වූ සම්මානය හිමිකරදුන්නේ ය. මෑතකාලීනව ලොව පුරා අවධානයට පාත්‍ර වූ බොං ජූන්-හෝ ගේ "Parasite” චිත්‍රපටය සහ "Squid Game” කතාමාලාවෙන් පසුව, මෙවර පාක් චන්-වූක්ගේ “Decision to Leave” දකුණු කොරියානු නිර්මාණය වෙත විචාරක නෙත් විවර කරවන්නට සමත්වූවක් බැව් සඳහන් කළ හැකි ය. කථාවේ ප්‍රධාන චරිත දෙකෙන් එකක් වන හේ-ජූන් (පාක් හේ-ඉල්) යනු කාර්යශූර පොලිස් රහස් පරීක්ෂකවරයෙකි. කලබලකාරී බුසන් නගරයේ පොලිස් පරීක්ෂකවරයකු වන මොහු කඩවසම් පුද්ගලයකු වන අතර, සමාජයේ ගෞරවයට පාත්‍රවූවෙකි. ඔහු සිය බිරිඳ (ලී ජුං-හ්‍යුන්) සමඟ දිවිගෙවයි. කෙසේනමුත්, පුද්ගල ඝාතන විමර්ශන අංශයෙහි කටයුතු කරන හේ-ජූන් හටත්, නගරයේ සිට පැය ගණනක් දුරින් වූ ප්‍රදේශයක සේවයේ නියුතු ඔහුගේ භාර්යාවටත් එකිනෙකා සමඟ ගත කරන්නට ලැබෙන්නේ අල්ප වේලාවකි. තමන් වෙත විමර්ශනය කරන්නට ලැබෙන මිනීමැරුම් එතරම් කුතුහලය දනවන ඒවා නොවන බව පවසමින් හේ-ජූන් සිය සහායකයා වෙත (ගෝ ක්‍යුං-පෝ) මැසිවිලි නඟයි. මේ අතර යාබද කඳුකර පෙදෙසක තිබී පිරිමි මළසිරුරක් හමුවන අතර, ඒ පිළිබඳ විමර්ශනය හේ-ජූන් වෙත පැවරේ. එහි දී මියගිය පුද්ගලයාගේ අතිශය රූමත් බිරිඳ වන සෝ-රේ (තාං වෙයි) නම් චීන ජාතික සාත්තු සේවිකාව දැන හඳුනාගන්නට ඔහුට හැකියාව ලැබේ. කෙසේනමුත් සිය ස්වාමියාගේ වියෝවෙන් කම්පාවට පත්නොවන ඇය පිළිබඳ හේ-ජූන් තුළ ඇතිවන්නේ සැකයකි. ඇය එම ඝාතනය සමඟ සම්බන්ධයක් නොමැති බව පෙනීගිය ද, හේ-ජූන් රහසේ ඇයව සහ ඇගේ නවාතැන දුරසිට නිරීක්ෂණය කරන්නට පෙළඹෙයි. කෙසේනමුත් මෙම සැකය කෙමෙන් ආකර්ෂණයක් බවට පරිවර්තනය වන්නේ නොසිතූ අයුරිනි. මූලිකව විමසා බැලීමේ දී “Decision to Leave” යනු ප්‍රධාන වශයෙන්ම ප්‍රේම වෘත්තාන්තයක් බව පෙනී යයි. එසේවුවද, මෙහි ශෘංගාරාත්මක ජවනිකා අන්තර්ගත වන්නේ අල්ප වශයෙනි. හේ-ජූන් සහ සෝ-රේ එකිනෙකාව ස්පර්ශ පවා නොකරන තරම් ය. එහෙත් කථාවේ ගලායාමට ප්‍රධාන චරිතද්වයෙහි රංගන ප්‍රතිභාව මෙන්ම, ජවනිකාවල වූ විචිත්‍රවත් දර්ශන ඛණ්ඩ පෙන්ම සංකේත භාවිතය උපකාරී වී ඇත. මෙහි එක් ජවනිකාවක වූ එකිනෙකාගේ රළු දෑත් මත ආලේප තවරන දර්ශනය බෙහෙවින් සිත්ගන්නාසුලු ය. සෝ-රේ වෙනත් පුද්ගලයකු සමඟ යළි විවාපත් වන නමුත්, ඇගේ සහ හේ-ජූන්ගේ සබැඳියාව තවදුරටත් නොවෙනස්ව පවතින බව පෙනෙන්නට තිබේ. මෙලෙසින් කථාව තවදුරටත් ඉදිරියට ගලායන්නේ සංකීර්ණ අයුරිනි. මෙම චිත්‍රපටයේ කැමරාකරණය සිදුකළ කිම් ජි-යොං පිළිබඳව සඳහන් කිරීම වටී. ඔහු සිය දර්ශන ඛණ්ඩ තුළ වෙනස් කෝණවලින් රූගත කරන අතරතුර, ප්‍රතිබිම්බ සහ සමමිතීන් ද මනාලෙස ඒ තුළ උපයෝගී කොටගෙන ඇත. එසේම චිත්‍රපටයේ සංගීත නිර්මාපක චෝ යොං-වුක් චිත්‍රපටයේ පසුබිම් සංගීතය අවස්ථාවෝචිත අයුරින් මෙහෙයවා ඇති බව පෙනේ. සරලව ගත්කල රූමත් ප්‍රධාන කාන්තා චරිතයක් කේන්ද්‍ර කරගත් චන්-වූක් ගේ මෙම "Decision to Leave" චිත්‍රපටය ඔහුගේම “The Handmaiden” චිත්‍රපටය සමඟ යම් යම් සමානකම් පෙන්වන බැව් පෙනේ. අවසාන වශයෙන් මනසෙහි වූ මුළාවන ස්වභාවයත් සහ හැඟීම්වල වූ වෙනස්වනසුලු ස්වභාවයත් මනාව කියාපාන මෙම සිනමා නිර්මාණය නැරඹීමට අගනා නිර්මාණයක් බැව් සඳහන් කළ යුතු ය. ***** හංගුල්: 헤어질 결심 අධ්‍යක්ෂණය: පාක් චන්-වූක් තිර රචනය: ජොං සෝ-ක්‍යොං, පාක් චන්-වූක් නිෂ්පාදනය: පාක් චන්-වූක් ප්‍රධාන චරිත: තාං වෙයි, පාක් හේ-ඉල් මුදාහළ දිනය: 2022 මැයි 23 (කන්); 2022 ජූනි 29 (දකුණු කොරියාව) ධාවන කාලය: මිනිත්තු 138 රට : දකුණු කොරියාව භාෂාව: කොරියානු