Blog

එදා මෙදාතුර පළමු හා දෙවන ලෝක යුධ වකවානුව මෙන්ම තවත් බොහෝ යුද්ධයන් අලලා ද චිත්‍රපට ගණනාවක් නිමැවී ඇත. ඒ අතරින් තවත් එක් සංවේගාත්මක චිත්‍රපටයක් ලෙස The Boy in the Striped Pyjamas හැඳින්විය හැකිය. මිනිත්තු අනූ හතරක ධාවන කාලයක් සහිතව 2008 වසරේ එක්සත් රාජධානියේ දී තිරගත වූ මෙය දෙවන ලෝක යුධ සමය අලලා නිමැවී ඇත. British Independent Film Award (2008) සහ තවත් චිත්‍රපට උළෙල කිහිපයක් නියෝජනය කළ හා සම්මාන දිනාගත් මෙම චිත්‍රපටය Bisto Book of the Year සම්මානය දිනාගත් අයර්ලන්ත නවකතාකරුවකු වන John Boyne ගේ The Boy in the Striped Pyjamas නවකතාව ඇසුරෙන් නිපදවා ඇත. චිත්‍රපටයේ අධ්‍යක්ෂනය Mark Herman. මෙම චිත්‍රපටය ගෙතෙන්නේ දෙවන ලෝක යුධ සමයේ ජීවත් වූ අටහැවිරිදි ජර්මානු පිරිමි ළමයකු වන Bruno වටාය. ඔහු තම මව, පියා, සහ සහෝදරිය සමඟ බර්ලිනයේ සුවිසල් නිවසක වාසය කරයි. බෲනෝගේ පියා හිට්ලර්ගේ නාසි හමුදාවේ නිලධාරියකු වන අතර ඔහුට උසස්වීමක් ලැබීම නිසා නගරය හැරදමා පියාගේ අලුත් සේවා ස්ථානය පිහිටි ගම්බද ප්‍රදේශයකට යන්නට බෲනෝට සිදුවේ. ඒත් ඔහු ඒ ගමන යන්නේ කැමැත්තකින් නොවේ. බෲනෝ සහ ඔහුගේ වැඩිමල් සහෝදරිය නොදන්නා දෙයක් ඇත. ඒ ඔහුගේ පියා යුදෙව් ඝාතකාගාරයක අණ දෙන නිලධාරියකු බවයි. බෲනෝගේ මව පවා දන්නේ ඔහු සාමාන්‍ය සිරකඳවුරක ප්‍රධානියා ලෙස පමණි. අලුත් නිවසේ තම කාමරයේ ජනේලයෙන් පෙනෙන සිරකඳවුර ගොවිපොළක් ලෙස වටහා ගන්නා මේ කුඩා කොලුවා ඒ පිළිබඳව දක්වන කුතුහලය එතැන් සිට චිත්‍රපටය පුරාම දක්නට ලැබෙයි. එහි සිටින්නේ පිජාමා ඇඳුම් හැඳගත් අමුතු ගොවියන් බව සිතන බෲනෝ අපූරු සිතුවමක් ද අඳියි. මේ කුඩා දරුවන් දෙදෙනාගේ සිත්වල පවා යුදෙව්වන් කෙරෙහි වෛරයක් ඇති කිරීමට ඔවුන්ගේ අලුත් ගුරුවරයා වෑයම් කරයි. අහිංසක සිතක් ඇති බෲනෝට ඉන් බලපෑමක් ඇති වේවිද?? නියම නාසි දැරියක වීමට සිතා බෲනෝගෙ සොයුරිය තම සියලු බෝනික්කන් නිරුවත් කොට ඉවත දමන අතර එය සිහි කරන්නේ මරා දමන ලද යුදෙව් සිරුරු එකමත ගොඩගසා ඇති අයුරකි. දිනෙක මේ සිරකඳවුරේදී යුදෙව්වන් මරා පුළුස්සා දමන බව දැනගන්නා මව පියා සමඟ උරණ වෙයි. බෲනෝගේ සිතේ ද පියා කෙරෙහි සැකයක් ඇති වන බව දක්නට ලැබේ. ඔහුගේ සිතේ තමා පියා කෙරෙහි නැවත ආදරයක් ඇති වන අාකාරය ද චිත්‍රපටයේ පෙන්වා ඇත්තේ සෝපහාසී ලෙසය. සියල්ල වෙනස් වන්නේ බෲනෝ වටපිටාව ගවේෂණය කිරීමට තීරණය කිරීමත් සමඟය. ඔහුට තහනම් පිටුපස මිදුලේ ගබඩාවේ ජනේලයකින් ඔහු සත්‍ය ලොවට විවරයක් තනා ගනියි.එහිදී ඔහුට ෂ්මූල්(Shmuel) මුණගැසෙයි. විදුලිය කාවද්දන ලද කටුකම්බි වැටකින් වෙනකරන ලද සිරකඳවුරේ ජීවත් වන ඉරි සහිත පිජාමා ඇඳුමක් හැඳගත් කිලිටි පෙනුමැති කුඩා කොලුවා සහ බෲනෝ අතර ඇතිවන අපූරු මිත්‍රත්වය කුඩාවුන්ගේ ලොවේ ඇති අහිංසක බව පෙන්වා දෙයි. වරෙක බෲනෝ පවසන්නේ මිතුරන් ගොඩක් සමඟින් Shmuel වැටෙන් එළියෙහි ගෙවන ජීවිතය ගැන වැට තුළ පාළුවෙන් ජීවිතය ගෙවන තමාට ඉරිසියා හිතෙන බවයි. Shumelගේ ලෝකයේ මිනිසුන් ගැන බෲනෝගේ සිතේ බොහෝ ගැටළු ඇත. අල පොතු ගැසීම සඳහා සියල්ල අත් හළ යුදෙව් වෛද්‍යවරයා ඉන් එකකි. වරක් බෲනෝ අසන්නේ වැට තුළ සිරවීමට Shmuel කල වරද කුමක්ද යන්නයි.. " මම යුදෙව්වෙක්" Shmuelගේ පිළිතුරයි. කඳවුර තුළදී අතුරුදන් වන පියා සොයාගැනීමට උදව් කිරීමට පොරොන්දු වන බෲනෝ දිනෙක Shmuel ගෙන් දෙන ඉරි සහිත පිජාමාවකින් සැරසී කඳවුරට රහසින් ඇතුළු වේ. ඉතා ශෝකී අවසානයක් වුවද එමඟින් සිඳුවන්නේ බෲනෝගේ පියාට දෛවයේ සරදමට ලක් වීමට සිදු වීමකි. අත්වැල් අල්ලාගෙන ගෑස් කුටීරයක් තුළට පියමනින මේ කුඩා කොලුවන් දෙදෙනාත් වැටෙන් මෙහා සිට විලාප තබන බෲනෝගේ මවත් නරඹන්නන්ගේ නෙත් කඳුලින් තෙමනු නොඅනුමානය. මෙහි බෲනෝ ලෙස Asa Butterfield , Shmuel ලෙස Jack Scanlon, බෲනෝගේ මව ලෙස Vera Farmiga සහ බෲනෝගේ පියා ලෙස David Thewlis රංගනයෙන් දායක වේ.