Blog

Encanto කියන්නේ වෝල්ට් ඩිස්නි සජීවිකරණ චිත්‍රාගාර විසින් නිෂ්පාදනය කරනු ලැබූ හා වෝල්ට් ඩිස්නි සජීවිකරණ චිත්‍රාගාර හා Motion pictures එක්ව බෙදාහරින ලද පරිගණක සජීවීකරණ ඇමරිකානු සිනමාපටයක්. සංගීතමය, මනඃකල්පිත හා සුඛාන්ත ගණයට අයත් නිර්මාණයක්. Jared Bushand Byron Howard විසින් අධ්‍යක්ෂණය කරන ලද, Charise Castro Smith විසින් සම අධ්‍යක්ෂණය කරන ලද මෙම චිත්‍රපටයෙහි නිෂ්පාදනය කාර්යය සිදුකර ඇත්තේ Yvett Merino සහ Clark Spencer විසිනි. චිත්‍රපටය පටන්ගන්නේ චූටි ගැහැණු දරුවෙක් තමන්ගෙ අත්තම්මත් එක්ක කරන කතාබහකුත් එක්ක. ගැහැණු ළමයා මිරබෙල් මැඩ්රිගල්. අපේ කතාවෙ කතා නායිකාව. ඇගේ අත්තම්මා අල්මා මැඩ්රිගාල්. මිරබෙල්ගේ පවුල සාමාන්‍ය පවුලක් නෙවෙයි. ඉන්ද්‍රජාලික උරුමයක් තියන පවුලක්. අත්තම්මා මිරබෙල්ට කියමින් ඉන්නෙ මේ ඉන්ද්‍රජාලික උරුමය පවුලට දායාද වීමේ උත්පත්ති කතාවයි. කතාව මේකයි. සන්නද්ධ ගැටුමක් අතරතුරදී තරුණ විවාහක යුවළක් වන ඇබියුලෝ පෙඩ්රෝ සහ අල්මා මැඩ්රිගාල්ට ඔවුන්ගේ සිඟිත්තන් තුන්දෙනත් ( ජුලීටා, පෙපා සහ බෲනෝ) එක්කම කොලොම්බියාවේ ඔවුන්ගෙ ගම්මානයෙන් පලා යාමට සිදුවෙනවා. ප්‍රහාරකයින් පෙඩ්රෝව මරා දමනවා. අල්මා සතුව තියෙනවා ඉටිපන්දමක්. මොකද මේ සිදුවීම වෙන්නෙ රාත්‍රී යාමයක නිසා. පෙඩ්රෝ අහිමිවුන දුකින් බලාපොරොත්තු බිඳ වැටුණු අල්මා දුකින් වැළපෙනවා."නමුත් අපේ ජීවිතේ අඳුරුම මොහොතකදි අපිට ප්‍රාතිහාර්යයක් හිමිවුනා."අල්මා ඒ ප්‍රාතිහාර්යය ගැන කියන්න පටන්ගන්නෙ ඒ විදිහට. ඉන්පස්සෙ සිදුවෙන්නෙ ඇත්තටම ප්‍රාතිහාර්යයක්. ඉටිපන්දම ඉන්ද්‍රජාලික ආලෝකයක් හරහා ප්‍රහාරකයන් පලවා හරින්නට සමත්වෙනවා වගේම, උස් කඳු වලින් මායිම් වූ ඉන්ද්‍රජාලික රාජධානියක් වන එන්කැන්ටෝ නිර්මාණය කරනවා අල්මා සහ ඇගේ දරුවන්ට වගේම ඔවුන් සමඟ ගම්බිම් හැරයමින් හිටපු අනෙකුත් පිරිසට. විශේෂයෙන්ම මැඩ්රිගාල් පවුල සඳහා සජීවී නිවසක් නිර්මාණය කරනවා.ඒ කැසිටා.... අවුරුදු 5ක් සම්පූර්ණ වුනාට පස්සෙ අල්මගේ දරුවන් තුන්දෙනා වුනු ජුලීටා,පෙපා සහ බෲනෝට විශේෂ හැකියාවන් හිමිවුණා, ඉන්ද්‍රජාලික ඉටිපන්දම මගින්. ඒ තුළින් එන්කැන්ටෝ වැසියන්ට උපකාර කරන්නට හැකිවන ලෙස..ඔවුන්ගේ දරුවනුත් එලෙස විශේෂ ත්‍යාගලාභීන් වුණා. ඉන්ද්‍රජාලික උරුමය හිමිවුණේ ඔන්න ඔහොම. මේ එළඹිලා තියෙන්නෙ මිරබෙල්ට අවුරුදු 5 සම්පුර්ණ වෙන දවස.ඇය තෑගි ලබන දිනය.. එතනින් පස්සෙ කතාව ගේන්නෙ වර්තමානයට. මිරබෙල් දැන් අවුරුදු 15ක විතර ගැහැණු දරුවෙක්. හරිම උද්‍යෝගිමත් චරිතයක්. ගමේ වෙසෙන දරුවන්, තමන්ගෙ පවුලේ අයට ලැබුණු තෑගි ගැන අහන්න පටන්ගත්ත නිසා එක එක්කෙනා ගැන වෙන වෙනම කියන්න පටන්ගන්නව මිරබෙල්. මේ වෙලාවෙදි ඇයට ලැබුණු තෑග්ග මොකක්ද අහනවා දරුවෙක්. ඒ වෙලාවෙදි තමා අපිට සැක දුරු වෙන්නෙ මිරබෙල් තෑගි ලබපු දවසෙ ඉතිරිය අපිට නොපෙන්නුවෙ ඇයි කියල. මොකද කියනවනම් අනපේක්ෂිත විදිහට එදා මිරබෙල්ට මුකුත් ත්‍යාගයක් ලැබිල නැහැ. තෑග්ගක් නොලැබුණු එකම සාමාජිකයා විදිහට ඇයට පවුලෙන් ලැබිල තියෙන තැන ගැන ඇය නොසතුටු බව ඇගේ මව වන ජුලීටා එක්ක ඇය කරන කතාබහකින් තේරෙනවා. ඉතින් අවුරුදු 10කට පස්සෙ ඇවිත් තියෙන්නෙ පෙපාගෙ බාල දරුවා වන ඇන්ටෝනියෝට අවුරුදු 5 සම්පුර්ණ වෙලා ඔහු තෑගි ලබන දිනය. සතුන් සමඟ කතා කිරීමේ හැකියාව තමයි ඔහු ලබන ත්‍යාගය. මේ අතර මිරබෙල් දකිනවා කැසීටාව ඉරිතලලා යනවා. ඒත් එක්කම ඉටිපන්දමේ දැල්ල නිවෙන්න ආසන්න වෙලා වගේත්. මිරබෙල් ගිහින් දැනුම් දෙනවා තමන් දැකපු දේ ගැන ඇන්ටෝනියෝගේ ත්‍යාග ලැබීමේ උත්සවයට ඇවිත් ඉන්න හැමෝටම. ඒත් කවුරුත් ඇගේ වචන ගැන සැලකිල්ලක් දක්වන්නේ නැහැ. හිතේ සැක දුරු කරගන්න එදා රෑ ආපහු මිරබෙල් යනවා ඉන්ද්‍රජාලික ඉටිපන්දම දැල්වෙන නිවසේ ඉහල මහලට, වහල දිගේ. එතකොට ඇයට ඇහෙනවා ඇගේ ආත්තම්මා ඇගේ මියගිය සැමියා පෙඩ්රෝගෙන් ඉල්ලනවා ,විනාශයක් වෙන්න නොදී හැමදේම ආරක්ෂා කරගන්න ඇයට උදව් කරන්න කියලා. මිරබෙල් මේ වෙලාවෙදි තමන්ටම සපත කරගන්නවා මොන දේ සිදුවුනත් පවුලේ උරුමය ආරක්ෂා කරගන්න ක්‍රමයක් තමන් හොයාගන්නවා කියලා. ගැටළුවට විසඳුම් හොයන්න පටන්ගැන්මක් විදිහට පවුලේ මායා බලය ලබපු අයට ඒ බලයෙ වෙනසක් දැනිල තියෙනවද කියල හොයල බලන්න තීරණය කරන මිරබෙල් ඇගේ වැඩිමල් සොයුරිය, පවුලේ ශක්තිවන්තම තැනැත්තිය ලෙස ත්‍යාගලාභිනිය , ලුයිසාගෙන් ඒ ගැන අහල බලනවා. ඒ වෙලාවෙදි මිරබෙල් දැනගන්නවා ඇය කැසිටා ඉරිතලා යනවා දැකපු වෙලාවෙම ලුයිසාටත් තමන්ගෙ ශරීරයේ යම් දුර්වලවීමක් දැනුණු බව. විසඳුමක් හොයන්න තැන බෲනෝගෙ කුටිය කියලත් මිරබෙල්ට යෝජනා කරනවා, ලුයිසා.මේ බෲනෝ කියන්නෙ ඔවුන්ගේ මාමා. මිරබෙල්ගේ අම්මගෙ සහෝදරයා . ඔහුගේ විශේෂිත හැකියාව වෙලා තියෙන්නෙ අනාගතය දැකීමේ හැකියාව. කාලෙකට කලින් ඔහු දැකපු අනාගතයේ සිදුවන යමක් නිසා ඔහු කැසිටා අතහැරල ,මැඩ්රිගාල් පවුලෙන් වෙන්වෙලා ගිහික් තියෙනවා. විසඳුමක් හොයනවනම් පටන්ගන්න තැන විදිහට ලුයිසා බෲනෝගේ කුටිය යෝජනා කරන්නෙ ඒ නිසයි. තමන්ගේ නිවසත් (කැසීටා),එන්කැන්ටෝ රාජධානියත් ආරක්ෂා කරගන්න විසඳුමක් හොයාගන්න අරමුණින් බෲනෝගෙ කුටියට යන මිරබෙල් සොයාගන්නෙ ඇයටවත් සිතාගන්නට බැරි තරමේ බරපතල යමක්.ඒ මොකක්ද කියල දැනගන්න නම් ඔබට මේ සිනමාපටය නරඹන්නම වෙනවා. සිනමාපටය මුදාහැරීමෙන් පසුව එහි චරිත නිරූපණය, සංගීතය, සජීවිකරණය, හඬ රංගනය, චිත්තවේගීය ගැඹුර සහ සංස්කෘතික අනුකූලතාවය වෙනුවෙන් විවේචනාත්මක පැසසුමට ලක් වුනා ,Encanto. චිත්‍රපටය පිළිබඳ සපයන ලද සමාලෝචන වලට අනුව නම් මේ නිර්මාණයේ මූලික සංකල්ප විදිහට දක්වන්නෙ, මායාවේ යථාර්ථ නිරූපණය සහ පරම්පරා වෙනසකදී ඇතිවන කම්පනයයි. ඇතැමුන් මෙම නිර්මාණය සංස්කෘතිකමය ප්‍රපංචයක් ලෙසත් දකිනවා.හේතුව තමයි කොලොම්බියානු සංස්කෘතිය අති විචිත්‍රවත් අන්දමින් නිර්මාණය තුලින් ප්‍රදර්ශනය වීම. 94 වන ඇකඩමි සම්මාන උළෙලේදී මෙම සිනමාපටය සම්මාන තුනක් සඳහා යෝජනා වුණු අතරම හොඳම තවත් බොහෝ සම්මාන රාත්‍රින්හීදී සම්මානයට හා ඇගයීමට පාත්‍රවිය. පෞද්ගලිකව මගේ ප්‍රියතම චිත්‍රපට ලැයිස්තුවේ මෑතකාලීනව ඉහලින්ම තියෙන නිර්මාණයක්"Encanto". ඔබට ඔබ පිළිබඳවම වටිනාකමක් නැති, අවලංගු වුණු, කමකට නැති හැඟීමක් දැනෙන මොහොතක ඔබ නැරඹිය යුතුම නිර්මාණයක් "Encanto".මහා ගැඹුරු ,සංකීර්ණ කතාවක් නොවුණත් එය සමාජයට පණිවිඩයක් ගෙනඑනවා. ඒ තමයි, පුද්ගලයන් වශයෙන් අප එකිකෙනාට අපිටම ආවේණික වුණු වටිනාකමක් ඇති බවත්,විශේෂයෙන්ම ඔබ ප්‍රාතිහාර්යයක් පිළිබඳ විශ්වාස නොකරන තාක්කල් එය සිදුනොවන බවත් . ඉතින් අධ්‍යයන සමාසිකයක මුල ,මැද හෝ අග මානසික පීඩනයෙන් මිරිකිලා ඉන්න හැමෝටම ආරාධනා කරනවා,නරඹන්න...Encanto.....